1.230 erreklamazio orri aurkeztu dizkiote Uribeko ESIaren zuzendaritzari

Hainbat eragile eta osasun langilek azken hilabetean jaso dituzten 1.230 erreklamazio orriak batu eta Uribeko ESIaren zuzendaritzari eman dizkiote Urdulizko ospitalean.

Leioan Bizi Plataformak, Algortako Osasun Publikoa Aurrera herri plataformak, Erandioko herri plataformak, Izartuk eta Txorierriko osasun publikoaren aldeko taldeak azken hilabetean jasotako 1.230 erreklamazio orri entregatu dizkiote Uribeko ESIaren zuzendaritzari, astearte honetan, Urdulizko ospitalean.

Aurkeztutako erreklamazio orriek, oro har, Osakidetzaren gabeziak salatzen dituztela azaldu dute kexak entregatu dituzten eragileek: «Herritarren erreklamazio horiek, pandemiak eta honen kudeaketak agerian utzi dituen osasun sistema publikoaren gabeziak salatu dituzte; presentzialtasun eza, Lehen Arretaren baliabide falta, langileen baldintza prekarioak.... eta herritar orori eskubide osoz kalitatezko zerbitzu publikoa bermatzea exijitu dute».

Era berean, plataformek Lakuak hartutako erabaki politikoei egotzi diote Osakidetzaren egoeraren erantzukizuna. «Lehen Arretak gainezka egin badu, urte luzez Eusko Jaurlaritzak hartutako politiken ondorioz izan da. Pribatizazioa, zerbitzuen externalizazioa, sistema publikoko langileen lan baldintzen prekarizazioa, murrizketak... izan dira osasun sistema kolapsatu dutenak», ondorioztatu dute salaketa publikoa plazaratu duten taldeek.

Erreklamazioekin batera, plataformek osasun sistema «unibertsal, doako eta kalitatezkoa» aldarrikatzen dutela jakinarazi dute eta, horretaz gain, inbertsio falta salatu dute: «Bankuak erreskatatzeko dirua egon zen bezala, eta zoritxarrez gastu militarra handitzeko gaitasuna erakusten ari diren bezala, zerbitzu publikoak indartzeko dirua dago. Borondate politikoaren kontua da».

Agerraldiaren amaieran, plataformek kalitatezko osasun publiko baten alde mobilizatzen jarraitzeko gonbita luzatu diete herritarrei.