Hirugarren gradua kendu ondoren, kartzelara itzuli behar izan du Asier Rodriguez santurtziarrak
Hirugarren graduaren kontrako helegitea onartu ondoren, Asier Rodriguez santurtziarrak Basauriko espetxera itzuli behar izan du, Etxeratek jakinarazi duenez. Ostiralean manifestazioa deitu dute bere herrian.
Etxeratek jakinarazi duenez, hirugarren gradua kendu diotenez Basauriko espetxera bueltatu behar izan du Asier Rodriguez santurtziarrak.
Etxeratek ohar batean azaldu duenez, Espainiako Auzitegi Nazionaleko Espetxe Zaintzako Epaitegi Zentralak Lakuako Gobernuko Justizia Sailak preso bizkaitarrari emandako hirugarren graduaren aurka Fiskaltzak jarritako helegitea onartu du eta, ondorioz, Rodriguez berriro espetxean sartu dute.
Azkenaldian hirugarren graduen kontrako helegite ugari izan dira Auzitegi Nazional espainolean, Fiskaltzak sistematikoki errekurritzen baititu. 2021 urtearen erdialdetik hirugarren gradua indargabetzen dietelako espetxera itzuli behar duen bederatzigarren presoa da Rodriguez.
Asier Rodriguezek hamabi urte baino gehiago eman ditu espetxean. 2020ko uztailean Granadako espetxetik (Euskal Herritik 855 kilometrora) Soriako kartzelara (260 kilometrora) lekualdatu zuten. 2021eko irailean Basauriko espetxera hurbildu zuten. Hirugarren graduan zegoen.
🟢📌 Basauriko espetxera bueltatu behar izan du Asier Rodriguez preso santurtziarrak, Auzitegi Nazionaleko (AN) Espetxe Zaintzako Epaitegi Zentralak aginduta. Eusko Jaurlaritzako Justizia Sailak preso bizkaitarrari hirugarren gradua eman zion
— Etxerat Elkartea (@EtxeratElkartea) January 25, 2023
Oharra 👇https://t.co/OLDkVLzCbO
Manifestazioa ostiralean Santurtzin
Sarek deituta, manifestazioa egingo dute ostiral honetan Santurtzin, 19.30ean, Asier Rodriguezen espetxeratzea salatzeko. Parkeko peatonaletik abiatuko da.