Gidari bat atxilotu dute Irunen, ertzain bat jo eta alkoholemia-tasa hirukoizteagatik

Ertzaintzak 25 urteko gizonezko bat atxilotu du Irunen, autoa ez gelditzeagatik eta ertzain bat jotzeagatik. Atxilotuak baimendutako alkohol tasa hirukoiztu du.

Ertzainek auto baten gidaria atxilotu dute Irunen agintaritzako agenteen aurkako atentatua eta alkoholemia leporatuta. Gidariak, 25 urteko gazteak, alkoholemia-proban 0,78 eta 0,73 miligramoko alkohol-tasak eman zituen, baimendutako tasa 0,25 miligramokoa izanik.

Segurtasun Sailak ohar batean azaldu duenez, larunbat goizaldeko 7.00etan Arizmendi etorbidean zihoan patruila batek auto bat ikusi zuen martxan, gurpil bat zulatuta eta aurreko kolpe-leungailuan kolpe handia zituela.

Atxilotuak uko egin zien autoa gelditzeko emandako aginduei. Gainera, bidean zihoala aparkatuta zegoen auto bat jo zuen eta, handik pixka batera, garaje batean sartu zen ertzainak atzetik zituela. Aparkalekuan maniobrak egin zituen agenteak barrura sar ez zitezen.

Kopilotuaren atetik sartzen saiatu zen ertzain bat jo eta hormaren kontra bota zuen gazteak. Azkenean, ertzainetako batek autoan sartzea eta kontaktu-giltza kentzea lortu zuen. Jarraian, gaztea atxilotu zuten, nahiz eta, oharrean adierazten denez, agenteei aurre egin zien ostikoak eta zartadak emanez.

Autoarekin jo zuen agentea ospitalera eraman behar izan zuten eta baja hartu zuen. Gero jakin ahal izan zutenez, Ertzaintzaren patruilarekin gurutzatu aurretik gidari horrek istripua izan zuen beste auto batekin Irungo Alberto Larzabal kalean.