EAEn Nafarroaren antzeko Aberastasunaren Zerga nahi du EH Bilduk, 2,5 milioitik gora biltzeko
Nafarroa eredu hartuta Araba, Bizkai eta Gipuzkoan Aberastasun Handien gaineko Zerga ezartzea proposatu du EH Bilduk, ekarpen solidario hori egin behar duten pertsona aberatsen kopurua handituz.
Nafarroan ezarrita dagoen Aberastasun Handien gaineko Zergaren antzekoa Araban, Bizkaian eta Gipuzkoan ezartzea proposatuko du EH Bilduk, «Nafarroan eman zen adostasun zabala errepikatuz eta ekarpen solidario hori egin behar duten pertsona aberatsen kopurua handituz eta hortaz, EAJ eta PSEk hiru lurraldeetarako egindako proposamenarekin bilduko liratekeen 2,5 milioi baino gehiago bilduz». Bizkaian, gainera, EH Bilduk tipoak igotzea proposatu du, «3,2 milioi euroko likidazio oinarritik abiatuta, Gipuzkoakoekin eta Arabakoekin harmonizatzeko».
Helburu horrekin, EH Bilduk Bizkaiko, Arabako eta Gipuzkoako Batzar Nagusietan zuzenketak egingo dizkie Fortuna Handien gaineko Zerga arautzen duten foru arauei, hamaika milioi euroko ondaretik aurrera tarte berri bat sortzeko eta %3,5eko tasa ezartzeko, Nafarroan egin zen bezala. Bizkaiaren kasuan, zuzenketak aldez aurretik Arabarekin eta Gipuzkoarekin harmonizatzea ere jasoko du, proposamenaren arabera.
«Zergaren helburua betetzea»
Iker Casanova, Maddalen Iriarte eta Eva Lopez de Arroyabe, hurrenez hurren, Bizkaiko, Gipuzkoako eta Arabako Batzar Nagusietako EH Billduko bozeramaileek adierazi dutenez, EH Bilduren xedea da Aberastasun Handien gaineko Zergak «bere helburua betetzea» eta, era berean, «EAJk eta PSEk zerga hori edukiz husteko egindako ahalegina bertan behera gelditzea».
Adierazi dutenez, hiru lurraldeetako hiru gobernuek aurkeztu dituzten foru arauen proposamenekin, une honetan, bost zergadunek bakarrik ordainduko lukete Fortuna Handien Zerga Araban, bederatzik Gipuzkoan eta 51k Bizkaian; horrek esan nahi du Araban 200.000 euro bilduko liratekeela, Gipuzkoan 300.000 eta Bizkaian bi milioi baino ez.
«EAJren eta PSEren proposamenak Fortuna Handien gaineko Zerga edukiz husteko eta aberatsentzako foru baimena aplikatzeko saiakerari erantzuten dio, hau da, zerga hori ezartzeko beharrarekin bete baina gero, praktikan, zerora murriztuta utzi», adierazi dute. Haien ustez, EAJren eta PSEren erabaki horren atzean «gure lurraldeetako pertsona aberatsenen interesen alde egiteko asmoa» dago. «Lehiakortasun fiskalaz hitz egiten dutenean, aberatsei hemen Estatuan baino zerga gutxiago ordaintzen laguntzeaz ari dira», ohartarazi dute.
«EAJ eta PSOEre argudioa, jasanezina»
Era berean, EAJren eta PSEren argudioa «guztiz jasanezina» dela uste dute, Ondarearen gaineko Zergaren ondorioz biltzen dena Fortuna Handien gaineko Zergarekin bildu daitekeenarekin alderatu nahian, «elkarren baztertzaileak diren bi zerga izango balira bezala». «Ez gaude zerga baten edo bestearen eraginaz hitz egiten, baizik eta bien efektu konbinatuaz, eta EAJ-PSEk fortuna handien zergaren eragina desaktibatu nahi dute». «Ez du zentzurik bi zerga horiek errealitate baztertzaile gisa aipatzeak, osagarriak baitira», nabarmendu dute.
Egoera horren aurrean, EH Bilduko ordezkariek adierazi dute «irmotasunez erantzun» dela eta zerga egituraren progresibotasuna handitzea defendatu dute, «gehien duenari gehiago ordainaraziz». Beraz, EH Bilduk fiskalitate progresibo baterantz aurrera egitearen aldeko apustua egin du, eta Fortuna Handien gaineko Zerga horretarako aukera bat dela uste du.
Gogorarazi dute EAJk eta PSEk ez dutela gehiengorik Arabako eta Gipuzkoako Batzar Nagusietan eta, beraz, akordioak lortu beharko dituztela Fortuna Handientzako Zerga Solidarioa onartzeko.
«Proposamen honekin akordioak errepikatzeko eta aberastasun handien gaineko zergaren bilketa potentziala salbatzeko eskua luzatzen dugu, Nafarroan gertatu zen bezala», azpimarratu dute.