Peru Abarrategi nagusitu da Arabako Bertsolari Txapelketako lehen saioan

Izarrak hartu du Arabako Bertsolari Txapelketako estreinako saioa eta Peru Abarrategi izan da puntu gehien poltsikoratu dituen bertsolaria. Oionek hartuko du hurrengo saioa, otsailaren 4an.

Urteurren gozoarekin iritsi da aurten Arabako Bertsolari Txapelketa; izan ere, 40 urte betetzen dira Arabako lehen txapelketa jokatu zenetik. Formatu berriko XVI. edizioari ateak ireki dizkiote igandean Izarran eta, Bertsozale elkartetik adierazi dutenez, «azken edizioetan irudikatu genuen ibilbideari jarraiki, Arabako bertsolaritzaren gailurrak irudikatzen dituen paisaia prest, 18 bertsolariekin jokatuko den txapelketako lehen fasea hasi da», ospatu dute.

Lehen fase honeta 13 bertso puntuagarri bete behar dituzte bertsolariek eta, Izarrako lehen saioan, ariketa guztiak burututa, Peru Abarrategi izan da puntu gehien bildu dituen bertsolaria, 259 punturekin. Gertu izan ditu Aitor Ugarte eta Eli Zaldua, biak 250 punturekin, eta hauen atzetik geratu dira Paula Amilburu (249,5 puntu), Ekaitz Samaniego (242,5 puntu) eta Danel Herrarte (238,5 puntu).

Saioa Olatz Santocildesek aurkeztu du eta epaimahaia, aldiz, Ekaitz Elorriaga Anduaga, Aitor Jimenez Tolosana eta Egoitz Iradier Martinez de Albenizek osatu dute. Endika Jimenez Enbeita aritu da idazkari lanetan.

Hiru final laurden izango ditu txapelketak (Izarran jokatutakoaz gainera, otsailaren 4an Oionen eta otsailak 11n Laudion izango dira beste biak), eta saio horiek ematen duten puntuazioaren arabera osatuko dira finalerdiak.

Txapelketaren gaineko informazioa eta egutegia, Arabako Bertsozale Elkartearen wengunean.