UPNk salatuta «terrorismoa gorestea» leporatuta atxilotutako bi emakumeak aske utzi dituzte
Espainiar Poliziak bi emakume atxilotu ditu astearte honetan, hauetako bat 63 urtekoa eta Iturmendikoa. Honen senideek NAIZi jakinarazi diotenez, Madrilgo Audientzia Nazionalera eraman dituzte, sare sozialetan «terrorismoa goratzea» leporatuta. Aske utzi dituzte gero. Salaketa UPNk jarri zuen.
63 urteko emakume bat eta adin ezezaguneko beste bat atxilotu ditu espainiar Poliziak, astearte honetan, eta Madrilgo Auzitegi Nazionalera eraman. Horietako baten senideek (63 urteko sakandarra) NAIZi jakinarazi diotenez, sare sozialetan «terrorismoa goratzea» leporatzen diote. Asteazken arratsaldeko lehen orduan jakinarazi dute aske utzi dituztela eta ikerketa UPNk jarritako salaketa batetik hasi zela.
Europa Pressek kontsultatutako iturri juridikoek diotenez, biek aldizka epaitegietan agertu beharko dute, eta ohiko bizileku bat izendatu beharko dute. Bertan ere azaltzen dute ikerketa UPNk jarritako salaketa bati esker hasi zela, bi emakumeek sare sozialetan argitaratutako mezu batzuengatik, ustez ETAren aldekoak.
Senideek salatu dutenez, emakumearen alaba batek jaso zuen dei baten bidez jakin zuten hau atxilotuta zegoela. Dei horretan ez zuten informazio gehiegirik jaso eta, azkenean, guardian zegoen ofiziozko abokatu baten bidez jakin zuten Iruñeko Chinchilla kaleko komisaldegian zegoela.
Azkenean, «15 segundoko dei batean» emakumeak berak konfirmatu zien familiakoei «ongi» zegoela eta Audientzia Nazionalera bidean zegoela. Madrileko abokatu batzuekin ere jarri dira kontaktuan.
Senideen iritziz, sare sozialetan «terrorismoa goratzea» baldin bada ere leporatu dioten delitua, «bera izateagatik» atxilotu dutela iritzi dute. Izan ere, 2016an zendu zen preso ohi baten bikotekidea zen.
Aske antolakundeak sare sozialen bidez atxiloketa salatu zuen eta asteazken honetarako batzar informatiboa deitu du, 19.00etan, Iturmendin.
🚨ADI🚨
— Aske Antolakundea (@aske_eh) February 6, 2024
Gaur goizean 63 urteko pertsona bat atxilotu dute Iturmendin terrorismoa goratzea egotzita, eta Madrilgo Audientzia Nazionalera eraman dute deklaratzera.
Bihar arratsaldeko 19.00etan batzar informatiboa burutuko dute Iturmendin.
INDAR ERREPRESIBOAK SUNTSITU!
Instrukzioko 6 zenbakiko Epaitegi Zentraleko epaileak, Joaquín Gadeak, kautelazko neurriak ezarri ditu, nahiz eta Auzitegi Nazionaleko Fiskaltzak aldez aurretik neurririk gabe aske uzteko eskatu. Biak epailearen esku jarri dituztenean, iturri horiek jakinarazi dutenez, ez deklaratzeko eskubideari heldu diote.