Gazara bideratuko duen laguntza bildu du Yala Nafarroak Iruñean

‘Bi ordu Palestinaren alde’ lelopean, Yala Nafarroak artista eta herritar ugari bildu ditu larunbat honetan Iruñeko Sarasate pasealekuan. Bertan bildutako dirua Palestinan giza eskubideen alde lan egiten duen elkarte bati eta biolentzia pairatu duten emakumeekin lan egiten duen bati bideratuko zaie.

Musika lagun, jendetza bildu da larunbat goiz honetan Iruñeko Sarasate pasealekuan. Bertan, Yala Nafarroa plataformak deituta eta ‘Bi ordu Palestinaren alde’ lelopean, dirua bildu da Palestinan lan egiten duten bi elkarteri bideratu asmoz.

Al-Haq, Al-Mezan Center eta Giza Eskubideen Aldeko Palestinako Zentroak, alde batetik, eta Palestinako Emakumeen Batzordeen Batasunak, bestetik, jasoko dute diru hori. Lehenek «laguntza behar dute Israel egiten ari den gerra eta gizateriaren aurkako krimenak ikertzeko eta Benjamin Netanyahu lehen ministroak nazioarteko auzitegietan kontuak emateko».

Bigarrenak, aldiz, ura, janaria eta arropa helarazten ari da, besteak beste, Gazara. Ekimenarekin bat egin dute oholtzara igo diren El Drogas, Kerobia, Eztitan, La Chula Potra, Madafack, Kai Etxaniz, Mielotxin, Burutik eta Alaitz institutuko ikasle talde bat. 

Maitane Meleno plataformako bozeramaileak nabarmendu du «oso garrantzitsua» dela Israelgo lehen ministroa nazioartean epaitzea. «Hori egin ezean, oro har bidaliko litzatekeen mezua oso larria eta arriskutsua izango litzateke, horrek etorkizunerako aurrekari bat sor bailezake».

Era berean, Palestinako nekazari talde bat egiten ari den lana goraipatu du, Gazako herritarrei elikagaiak eta ura emateko nekazaritza-proiektuetan lan egiten ari baita, «orain duten baliabide eta baliabide bakarrenetakoa baita».

Eneko Gerrikabaitiak, Mundubat elkarteko bozeramaileak, azaldu duenez, bere erakundea, Yala plataformarekin elkarlanean, «egun hauetan Nafarroako herritar guztiak sartzen ari diren baliabideak bideratzen ari da», eta, nabarmendu du, «zoragarria» dela elkartasun hori izatea.

Mundubateko ordezkariak Palestinako Emakumeen Batzordeen Batasuna egiten ari den lana goraipatu du; izan ere, «urteak daramatza laguntza psikosoziala ematen umezurtzak dituzten emakume alargunekin, umezurtzak, sarraski izugarri honen ondoren geratzen direnak eta berreraiki behar direnak, berriro ahaldundu behar dira».