Ezker paretako GRABNIko txapela berreskuratu du trinketean ere gailendu den Nafarroak

Gasteizen jokatutako finalen ostean, iaz txapeldun izan zen Bizkaiak lortu du bigarren postua frontoian eta Gipuzkoa izan da bigarren trinketean.

Iaz Bizkaia aldera joan zen ezker paretako GRABNIko txapela berreskuratu du Nafarrroak asteburu honetan Gasteizen jokatutako final guztiak amaituta. Gainera, trinketean ere nafar pilotariak izan dira finalik gehien irabazi dituztenak eta 2016tik lehen aldiz, bi txapelketetan nagusi izan dira.

Afizionatu mailako urteko zitarik garrantzitsuena izan ohi da GRABNI, selekzioka jokatzen den bakarra, eta bertan Gipuzkoa, Errioxa, Araba, Bizkaia, Nafarroako eta Iparraldeko pilotariek hartzen dute parte, modalitate desberdinetan.

Ezker paretean, garaipen eroso xamarra lortu dute nafarrek, jokatutako 25 finaletatik 15etan nagusitu baitira, bigarren postuan sailkatu diren bizkaitarrek baino lau gehiagotan. Gipuzkorrek gertu izan dituzte bizkaitarrak 10 izan baitira lortutako txapelak. Jokoan ziren bost finalak irabazita, zesta punta izan da bizkaitarren indarguneetako bat.

Gauzak estu trinketean

Gauzak askoz estuagoak izan dira trinketean, Nafarroak eta Gipuzkoak seina final irabazi dituztelako, baina nafarrak final gehiagotan izan direnez, eurek eskuratu dute azken garaipena.

Pilota egokitua izan da aurtengo berrikuntza nagusiena, kirol gero eta inklusiboago baterako bidean, adimen urritasuna eta urritasun fisikoa duten pilotariek euren txapelketak izan baitituzte lehen aldiz. Historiarako geratuko diren lehen txapel hauek Gipuzkoako ordezkarientzat izan dira.