San Juanek bere hautagaitza aurkeztu du etxeko uretan eta Zumaiak astea biribildu du

Zumaiak, ETE ligan, eta San Juanek, KAE 1 ligako estreinako estropadan, irabazi dute Pasaiako ikurrina. Telmo Deunaren kasuan, denboraldiko bigarren garaipena ospatu du, lehendabiziko asteburua ederki biribidluz. KAE2 ligan, Castreña nagusitu da, Donostiarraren aurretik.

Erlojuaren aurka lehiatu da igande honetan KAE1 ligako estreinako estropada, Pasai Donibaneko uretan eta etxeko trainerua erabat nagusi izan da, lehen txandan arituta. Joseba Fernandezen eskifaiak 20 minutu eta 36 segundo behar izan ditu 3 miliak osatzeko eta zentzu horretan, ez du areriorik izan. Are gehiago, Zumaia izan da bigarren sailkatua, ezustekoa emanda, ‘Erreka’ baino minutu erdi gehiago behar izan duela (21:12.42).

Hala, San Juanek berretsi du igoera lehiatzeko hautagaietako bat izango dela aurten ere. Iaz play-offetatik urrats batera geratu zen (laugarren bukatu zuen liga erregularra) eta hasi berri den denboraldian, Gipuzkoa zein Euskadiko txapelketan maila ona erakustearekin batera, indartsu dagoela berretsi du ligaren estreinaldian.

Ez du areriorik izan III. CMO Valves bandera astintzeko eta gainera, arerio zuzena izan daitekeen Lapurdirekiko aldea –iaz, Joseba Fernandezen gidaritzapean igoera jokatu zuten lapurtarrek–, sailkapen nagusian, bi puntukoa da, bien artean Zumaia sartu baita. Telmo Deunak baino zazpi segundo gehiago behar izan du Lapurdik estropada bukatzeko (21:1967) eta bere atzetik sailkatu da Santurtzi (21:24.63), Eusko Label ligatik jaitsi berria.

Arkote, Zarautz, Portugalete, Pedreña, Camargo, Orio B eta Deusto, helmugaratu dira hurrenez hurren. Hondarribia B, bestalde, kanporatua izan da, hain zuzen ere, motorra bezala zetorren etxeko traineruari bidea oztopatzearren.

KAE 1 liga - III. CMO Valves bandera

1. San Juan          20:37.66 (12 puntu)
2. Zumaia            21:12.42 (11 puntu)
3. Lapurdi            21:19.67 (10 puntu)
4. Santurtzi          21:24.63 (9 puntu)
5. Arkote             21:27.89 (8 puntu)
6. Zarautz           21:40.61 (7 puntu)
7. Portugalete     21:46.51 (6 puntu)
8. Pedreña          21:47.02 (5 puntu)
9. Camargo        21:57.79 (4 puntu)
10. Orio B          21:58.01 (3 puntu)
11. Deusto        22:03.54 (2 puntu)
12. Hondarribia  - kaleratua (0 puntu)

Zumaiaren bigarrena ETE ligan

Gizonezkoetan, Zumaiak ezustekoa emanda bigarren bukatu badu, emakumezkoetan beste garaipen eder bat pilatu du Telmo Deunak, asteburua ezin hobeto biribilduz. Hala, ETE ligako lidertza sendotu du –nahiz eta denboraldia hasi besterik ez den egin–. Zumaiarrek, bi garaipenekin, 16 puntu pilatu dituzte, Astillerok 14 dauka eta Kaikuk, 12.

Ikaragarria!!!! Zorionak @telmodeunAE @DELTECO1 pic.twitter.com/chfqOQVTqI

— Zumaiako Telmo Deun (@telmodeunAE) June 23, 2024

Hain zuzen ere, bezperan, Astilleroko uretan erregistratu zen sailkapena kasik bere horretan errepikatu da igande honetan XI. Pasaiako ikurrinaren lehian, bai behintzat goialdean. Are gehiago, lehia oso estua egon da Zumaia eta Astilleroren artean, larunbatean legez, eta azkenean, 79 ehunekogatik, zumaiarrek eraman dute garaipena.

Kaikuk egin du hirugarren, irabazlearengandik 8 segundora helmugaratuta. Zarautz, San Juan –lehen txandan denbora onena eginda, 12:13.88–, Deusto, Ondarroa eta Hernanik itxi dute sailkapena.

ETE Liga - XI. Pasaiako ikurrina

1. Zumaia       11:46.39
2. Astillero      11:47.08
3. Kaiku          11:54.40
4. Zarautz       12:09.11
5. San Juan     12:13.88
6. Deusto        12:30.86
7. Ondarroa     12:39.20
8. Hernani       13:01.60

ETE Liga - Sailkapen orokorra

1. Zumaia 16 puntu
2. Astillero - 14 puntu
3. Kaiku - 12 puntu
4. Zarautz - 10 puntu
5. San Juan - 7 puntu
6. Deusto - 7 puntu
7. Ondarroa - 4 puntu
8. Hernani - 2 puntu

Donostiarrak bigarren postua errepikatu

Pasaiako estropada eremuan uretaratzen lehendabizikoak KAE 2 ligako traineruak izan dira, hauek ere denboraldiko bigarren banderaren lehian, XXXIX. Pasaiako Bandera, zehazki. Castreñarentzat izan da garaipena, Donostiarrak bigarren postua errepikatu duela. Hala, Kaiarribakoek Astillerorekin –Pasaian, hirugarren– berdindu dute sailkapen nagusian (12 puntu).

Busturialdea izan da laugarren eta Hibaika, Lutxana eta Santoñak, hurrenez hurren, itxi dute sailkapena.

KAE 2 liga - XXXIX. Pasaiako Bandera

1. Castreña       22:43.47
2. Donostiarra   22:52.82
3. Astillero        22:53.19
4. Busturialdea  23:17.93
5. Hibaika         23:28.31
6. Lutxana        24:08.70
7. Santoña       25:45.00

KAE 2 liga - sailkapen orokorra

1. Astillero - 12 puntu
2. Donostiarra B - 12 puntu
3. Castreña - 11 puntu
4. Hibaika - 8 puntu
5. Busturialdea - 7 puntu
6. Lutxana - 4 puntu
7. Santoña - 2 puntu