Itxaso Zalduak aske jarraituko du, nahiz eta ezingo duen Estatu espainiarretik atera

Madrilgo Auzitegi Nazionalak hala adostuta, libre segituko du Itxaso Zaldua hernaniarrak. Hala ere, ezingo da Estatu espainiarretik atera. Oso kondena gogorra ezarri diote berriki, 110 urtekoa, baina ez da irmoa. Zigor Salak dio Zalduak «ez duela bitartekorik» ihes egiteko, ETA deseginda dagoelako.

Itxaso Zalduak libre jarraituko du. Hala erabaki du Madrilgo Auzitegi Nazionalak. Europa Press agentziak jasotako epaian, Zigor Salako epaileek uko egin diote Fiskaltzak eta AVT elkarteak eskatutako behin-behineko kartzelari. Berriki kondena oso gogorra jaso du hernaniarrak, 110 urtekoa, baina epaileek diotenez, kondena hori «ez da irmoa» eta ez dakar berarekin automatikoki ihes egiteko arriskua. Gainera, «kausa honengatik aske egon den denboran ez du ihes egin eta auzitegira aurkeztu da deitu duten guztietan».

Epaiak eransten du ez lukeela iheserako «bitartekorik» ere, ETA deseginda dagoelako.

Edozein kasutan, ezingo da Estatu espainiarretik atera auzitegiaren baimenik gabe.

15 urtez kartzelan, bi estatuetan

Azaroaren 9an, batzarra egin zuten Hernanin herrikideari Auzitegi Nazionalak ezarritako zigorraren berri eman eta elkartasuna adierazteko. Zalduak 15 urte eman ditu preso bi estatuetan. 2005etik 2017ra frantziar kartzeletan eduki zuten, oso urruti, eta 2020an berriz atxilotu zuten, Madrilen zigortzeko asmoz.

Iaz aske gelditu zen, Manuel Gimenez Abad Aragoiko PPko burua hiltzeko akusaziopean epaitu eta errugabe deklaratu ostean. Bigarren atentatu bat egotzi diote, ordea: Zaragozako Corte Inglesen aurka egindakoa.