Pasaiako portuko lonja berritzeko lanak azken fasean sartu dira
Pasaiako Portu Agintaritzak hasi ditu lonja berritzeko azken lanak. Hamalau hilabeteko iraupena izango dute eta horrela amaiera emango zaie portuko arrantza eremua egokitzeko lanei. Proiektuak 5,8 milioi euroko balioa du.
Pasaiako portuko lonjaren instalazioak berritzeko eta modernizatzeko lanak azken txanpan sartu dira azaroan, Agintaritzak jakinarazi duenez. Construcciones Amenabar enpresak egingo ditu lanak, hamalau hilabeteko iraupenarekin. Horrela, amaiera emango zaie portuko arrantza eremua egokitzeko lanei.
Behin proiektua amaituta, lonjak 5.000 metro karratu gehiago izango ditu beheko solairuan arrantza jarduerarako, eta 1.500 metro karratuko espazio gehigarria sotoan. Sotoaren azalera osoa 6.232 m²-koa izango da, eta beheko solairukoa 15.525 m²-koa, «egungo espazioa puntako instalazioekin handituz».
Portuko Agintaritzak ohar batean azaldu duenez, egingo diren lan nagusiak honako hauek izango dira: egungo argiztapenaren ordez LED teknologian oinarritutako sistema eraginkorragoak jartzea, zoladura jartzea, suteen aurkako babes instalazioa modernizatzea edo itsas geotermian oinarritutako klimatizazio sistema abiaraztea.
Horri esker, «badiako uraren tenperatura konstantea aprobetxatuko da urte osoan zehar behar den hotza sortzeko».
Horrekin batera, sotoko aparkalekura zuzenean sartzeko bigarren karga jasogailu bat instalatuko da, baita kontsumo elektriko telematikoak kontrolatzeko sistema bat ere; arraina eraldatzeko gela bat ezarriko da arrantza jarduera hobetzeko, eta enkante elektronikoa sartzeko beharrezko aurreinstalazioak ere egingo dira.
Proiektuak 5.766.375,59 euroko aurrekontua du; Europar Batasunak milioi bat eurorekin finantzatzen du, Europako Itsas, Arrantza eta Akuikultura Funtsaren (FEMPA) bidez, 1. lehentasun-lerroan, non helburua arrantza jasangarria sustatzea eta uretako baliabide biologikoak berreskuratzea eta kontserbatzea den.
David Candelario Portuko Agintaritzako zuzendariak nabarmendu duenez, berrikuntza lan hauen helburua da «arrantza euskal ekonomiarentzat eta gizartearentzat funtsezkoa den jarduera moduan indartzea, eta gure posizioa sendotzea, Pasaiako lonja Estatuko portu sistemaren barruan hirugarrena baita garrantziari dagokionez».