Ormaiztegin eta Arbonan jatorria duen familiaren ibilbidea azaldu ostean, zera adierazi du Berasategui-Erdocio sendiak: «Familia bati argazkiak eta oroitzapenak erre egin dizkiote, haur batzuek haien ikastolako lagunei azalpenak emateko zailtasunetan jarri dituzte eta amandre bati bere 90. urtebetetzea bere tropa txiki horretaz inguraturik ospatzea ekidin egin diote».

Astearte egusentian etxe bat erre zuten Heletan. Herriko auzapezak, Philippe Etxebestek, etxebizitza nafar familia batena zelakoan, «istripua izan ez zen» sute horren harira hainbat azalpen eman zituen egunean bertan. 

Konponbide prozesuaren testuinguruari zeharkako aipamena eginez, gertatutakoa ez zaiola ulergarria egiten azaldu du auzapez heletarrak FranceBleu irrati katean.

Suak etxea guztiz suntsitu zuela baieztatu du, bere aldetik, etxearen jabe den familiak. 90eko etxea erosi zutenetik, herriarekin izandako lotura zehaztu dute agiri horretan. Alegia, etxe ondoko lurra dohain ezarri zutela Heletako laborari baten eskuetan nabarmendu dute.

«Euskal Herria ez da salgai» leloa agertu zen margoturik Illantonia izeneko etxean. Jendarmeriak hartu du bere gain ikerketa, Baionako prokuradorearen agindupean. Litekeena da ondoko orduetan «terrorismoaren aurkako» Parisko fiskaltza dozierraz jabetzea.