«Aske Gunearen ondoren gauzak ez dira berdin izango»

Ikasleen babesa jaso dute gaur Donostiako zortzi auzipetuek. Ernaik eta Ikasle Abertzaleek deituta Lanuzteak egin dituzte ikastetxe eta unibertsitateetan eta Bulebarrera joan dira ondoren babesa adieraztera. Leporaino bete da aske gunea.

Ertzaintza bi aldiz izan da gaur goizaldean Aske Gunean, eta tentsio une latzak bizi izan dira. Zortzi zigortuen inguruan sortutako «herri harresiak», ordea, bi alditan ekidin ditu haien atxiloketak.

Urduritasuna, ordea, ez da gehiegi baretu Bulebarreko Aske Gunean. Sare sozialetan zabaldutako informazioen arabera, Euskal Herriko leku ezberdinetatik Ertzaintzaren hainbat furgoneta Donostiarako bidean jarri dira eta herritarrei bertaratzeko deia egin diete Aske Gunetik. Alerta piztu da, baina momentuz giroa lasaia da bertan.

Gero eta babes gehiago ari dira jasotzen donostiar gazteak. Gaurkoan, ikasleen partetik. Ernaik eta Ikasle Abertzaleek deituta lanuzteak egin dituzte ikastetxe eta unibertsitateetan eta ondoren Bulebarrerako bidea hartu dute. Bertan da @iontelleria lankidea eta jendez gainezka dagoela narbarmendu du.

Deskontrol taldearen emanaldia izan dute bertan eta manifestu bat irakurri dute ondoren. «Aske Gunearen ondoren gauzak ez dira berdin izango», ohartarazi dute, eta zortzi zigortuak atxilotu nahi badituzte «gure gainetik pasa beharko dutela» nabarmendu.