Aurrera darrai Chill Mafia kolektiboak ‘Agur eta ohore’ izenpean martxan jarritako despedida birak. Asteburu honetan Bilboko Kafe Antzokian ariko dira zuzenean, non bi egunetarako sarrera guztiak amaitu diren dagoeneko. Ostiral gauez La Txama taldeak zabalduko du gaualdia, mexikar doinuetan, eta berriki argitaratu duten diskoa besapean. Larunbat gauez, berriz, Borla taldea arduratuko da giroa berotzeaz.

Chill Mafiak hautsak harrotu zituen 2020 urte inguruan, eta geroztik fokua gainean izan dute. ‘Gazte arruntaren koplak’ abestia nahikoa izan zen arreta pizteko, eta gerora kolpeka egin zuten aurrera bideoak eta kantuak tartekatuz. Elektronikatik, musika koktelera arriskutsua eskaini zuen bandak, non, trapa, rapa, reggaea, reggetoia edo punkari muzin egin gabe, sailkatu ezineko doinu askeetan sakontzen duen kolektiboak. Bidean bi mixtape argitaratu dituzte, 2021 urteko ‘Ezorregatik x Berpizkundea’ debuteko lana, eta ‘Agur eta ohore x allá va la despedida’ azken estudioko emaitza. Tartean, lankidetza eta kolaborazio ugari Euskal Herriko zein atzerriko artista eta musikari lagunekin.

Azken diskoa argitaratzearekin batera, kolektiboak bidea etengo zuela adierazi zuen, eta bide horretan azken emanaldietan murgilduak dira nafarrak. Berriki Iruñean izan dira Zentral aretoa leporaino betez, eta Bilbon aritu eta gero Madril hiriko La Ribieran gunean eta Bartzelonako Apolo aretoan ariko dira martxoan BEC gunean azken emanaldia eskaintzeko.

Azken emanaldia

Martxoren 28an eskainiko du Chill Mafiak azken emanaldia, eta kontzertu berezi honekin taldearen bidea itxiko da, bost urtez Euskal Herriko musika eszena aztoratu eta gero. Dagoeneko 7.000 sarrera baino gehiago saldu dituzte, eta aretoaren edukiera handitu dute eskaera guztiei aurre egiteko. Azken kontzertu honetarako gonbidatu zerrenda handia da, eta besteak beste Nerve Agent, Hofe x 4:40, Euskoprincess, Bengo, La Txama, Arepas edo Mirua bezalako egitasmoek hartuko dute agertokia. Asteburu honetako ez, baino oraindik geratzen dira sarrera bakan batzuk azken emanaldirako.