Doctor Deseo taldeak bira berria jarri du abian  ‘Suavemente me mata con su canción’ izenpean. Emanaldi bereziak izango dira, non antzerkia eta kabaret giroak nagusituko diren ohiko formatutik at antzokietan eta leku goxoetan egingo diren emanaldietan. Guztira zazpi emanaldi hitzartu ditu bandak, eta Abenduaren hasieran Agurainen estreinatu ondoren, pasaden asteburuan leporaino bete zen Donostiako Victoria Eugenia antzokia. Ostiral honetan Iruñeako Baluarten ariko dira zuzenean, eta 27an Tolosako Leidor antzokian izango da zita. Urte berria Bilbon abiatuko dute, bi egunez arituz Arriaga antzokian arituz non sarrera guztiak amaitu diren dagoeneko. Bira honetako azken emanaldia Mungiako Olalde aretoan izango da urtarrilaren 17an. Doctor Deseo taldeko kideez gain, bi gonbidatu berezi ariko dira emanaldi guztietan eta bide horretan Aiora Renteria eta Itziar Sánchez ariko dira taldearekin batera agertokian. Lehena ahotsean. Bigarrena, akrobaziak egiten. Sarrerak dagoeneko salgai daude taldearen atari digitalean.

Kabareta eta antzerkia

Ez da lehen aldia Doctor Deseo taldeak kale giroko agertokiak eta kontzertu aretoak alde batera utzi eta antzokietan aritzen dela. Izan ere, aspalditik dute gustuko joera hau, taldearen kantuei beste bizi berri bat emanez. Hala ere, bira hau ez da aurrekoak bezalakoak izango, eta bide horretan antzerkiak eta kabaret giroek toki nabarmena izango dute datozen emanaldietan. Kantuak bereziki prestatu dituzte saio hauetarako, inoiz baino ‘glam’-ago arituz oholtza gainean. Kantu zerrenda berezia prestatu dute, ohiko kantu ezagunekin batera, kantu zahar batzuk berreskuratuz saio hauetarako. Bide horretan ez dira faltako ‘Corazon de tango’, ‘Abrazame’, ‘Darle fuego a Bilbao’, ‘Fugitivos de paraiso’, ‘Suspira y Conspira’ edo ‘Un mar de cerezas’ bezalako kantu ederrak.