Bilboko Euskalduna Jauregiak Aste Nagusian izango duen berrikuntza nagusia Urban Hall areto balioaniztun eta gardena benetako kabaret bihurtzea izango da. Euskalduna Klub izena eman zaio. Harmailak izango ditu, eta eszenatokitik hurbilen dagoen gunean mahaitxo baxuak.

Bilboko Hortzmuga konpainiak «sentimenduzko» komediaren eta show drag musikalaren «jai-giroko» konbinazioa ondu du. ‘Bidearen amaieran’. Antzezlana abuztuaren 22 eta 29an ikusi ahal izango da (20.00etan). Aste Nagusian antzerki karteldegiko euskarazko obra bakarra izango da. Horrez gain, gaztelaniazko emanaldiak ere programatu dira (‘Al fin del camino’ izenburuarekin, Aste Nagusian zein hurrengo astean).

Sarrerak ostiral honetatik aurrera daude salgai 28 eta 36 euro bitarteko salneurriekin, Euskaldunako leihatiletan eta webgunean.

Egokitzapena

‘Bidearen amaieran’ lanaren bertsio egokitua sortu du propio Hortzmugak Euskalduna Klub berrirako. Konpainiaren izenburu bereko jatorrizko antzezlanean oinarrituta dago.

Argumentuak bere horretan dirau: Divina Pedrea drag-a, Bilbora, bere jaioterrira itzuli da, eta duela 20 urte etxetik bota zuen, eta, orain, alzheimerraren ondorio izugarriak pairatzen ari den aitarekin elkartu da berriro. Hala ere, istorioak beste kutsu bat hartuko du orain, izan ere, Pedro, aita, Euskalduna ontzioletako sindikalista ohia da; hau da, ihes egin behar izan zuen hiriko Aste Nagusi betean semeak bere ikuskizunarekin lehen aldiz zapalduko duen eszenatoki dotorea dagoen lekuan zegoen lantegiko behargina.

Gainera, jatorrizko bikote protagonistari (Divina Pedrea antzeztuko duen duen Alex Antunez, eta Pedro izango den Gabriel Ocina), musikako piezatan bi dantzarik osatutako dantza taldea gehituko zaio (Bego Krego eta Mar Garcia).

Horien artean aipagarriak dira dagoeneko denbora gainditu duten lan arrakastatsuen erritmoa jarraituko duten musika lanak (Raffaella Carra, Karina...).

Argiztapen berria ere diseinatu da, eta LED pantailak gehitu zaizkio eszenografiari, show formatu «handiagoa» sortuz, konpainiaren berbetan. Aste Nagusirako ‘Bidearen amaieran’ berri honek «aita eta semea berriro elkartzeari buruzko vaudeville emozionala» izaten jarraituko du.

Beraz, «korapiloz, umorez eta, batez ere, sentimendu handiz betetako antzezlana, baina orain musika gehiago, dantza gehiago, jai giro gehiago eta ikuskizunaren parte sentituko den ikus-entzulearekiko interakzio gehiago izango ditu», iragarri dute.

Antzezlanaren jatorrizko gidoia Angel Mirou antzerkigile bizkaitarrarena da. Dokumentazio-fasean, hasieran oztopoak eta aurreiritziak apurtu behar izan zituzten, eta, batzuetan, familiengandik urrundu behar izan zuten euskal transformisten hainbat belaunaldiren laguntza izan zuen.

Sorkuntza prozesuan La Otxoak, Asier Bilbaok, Yogurinha Borovak eta Oscar Delgadok (Nagore Gore, Las Fellini) hartu zuten parte, drag artearen eta transformismoaren bidez LGTBIQ+ eskubideen aldeko borrokak izan dituen tokiko lau erreferente.

Antzezlana, «Aste Nagusirako egokia den ikus-entzule guztientzako jai-giroko korapilo-komedia izan arren», konpainiak zehaztu duenez, «hausnarketa ere bultzatu gura dugu, eta, batez ere, izan gura zuten bezala izateko borrokatu behar izan zutenei merezitako omenaldia egin gura diegu».

BBK Aretoa

Bestalde, BBK Aretoak ‘Urte berri off. ¡Feliz 2025! lana estreinatuko du. Gurutze Beitia, Mitxel Santamarina, Iñaki Maruri eta Maria Urcelay dira ikuskizunaren protagonistak. Abuztuaren 18tik 25era bitartean izango da kartelean.

Obra Beitiak eta Santamarinak idatzi dute. Ikus-entzuleek uneoro parte hartzen dutela sentituko duten barietate-komedia zoro bezala ulertzen du taldeak obra.

Izan ere, ikus-entzuleak izango dira akzioaren ardatza den urte amaierako galaren grabazioko ikus-entzuleak (adimen artifizial batek idatzi eta zuzendutako telebistako saio bat). «Programaren garapen zentzugabean galdera bat azalduko da une oro: Fidagarria al da dena AAren esku uztea?».

Horrela, BBK Sala osoa telebistako plato handia izango da. Ez da faltako Gabonetako «dekorazio kasposoa». «Era berean, jakina, ikus-entzule jaun-andreak euren kotiloi galarik onenekin etortzea espero dugu», adierazi dute konpainiatik, «Aste Nagusi batean Gabon Zahar gaua ospatzeko anakronismo dibertigarrira» batu daitezen.

Ikuskizuna BBK Salaren bosgarren ekoizpen propioa da.