Petti musikariak emanaldi berezia eskainiko du larunbatean Ataungo Herri antzokian. ‘XX ta Bortz’ izenpean burutuko den kontzertua grabatua izango da, eta zuzeneko disko batean bilakatuko da datozen hilabeteetan. Pettik bere ohiko banda den Etxeko Uzta izango du alboan emanaldi honetan, eta taula gainean zenbait lankidetza ere izango ditu, tartean, Ruben Caballero gitarra jotzailea, eta Estitxu eta Jokin Pinatxo. Ateak gaueko 22,00etan zabalduko dira, eta sarrerak eskuragarri dira dagoeneko 18 euroen truke Ataun bertako Sutegin, Troskaetan, Errotaundin, Udaletxean eta liburutegian. On line bidez ere erreserbatu daitezke honako loturan.

XX ta Bortz

25 urte igaro dira Pettik bere bakarkako lehen diskoa kaleratu zuenetik, eta hori ospatzeko bira berezi bat jarriko du abian Berako musikariak. Etxeko Uzta osatzen duten Igor Telletxea (bateria), Iñigo Telletxea (baxua), eta Joseba Irazoki (gitarra) izango ditu agertokian lagun, eta bere musika bidea errepasatuko du kantuak rock formatura bideratuz. Gainera, laukotea boskote bilakatu da, eta Ruben Caballero ariko da taldearekin batera gitarra-jotzaile bezala, gitarrek garrantzi handia izango duten saioan.

Izan ere, azken 25 urte hauetan territorio ezberdinetan murgildu izan da Petti musikalki, folketik rock sutsura doan bidai ederrean. Ahots lodi berezia, gitarra jotzeko ahalmen izaugarria, eta kantu bikainak sortzeko erraztasuna du Pettik, eta ederki erakutsi du hori eskaini dituen ehunka emanaldietan. Izan ere, diskografia oparoa batu du Pettik azken 25 urte hauetan guztietan, guztira estudioko hamairu lan plazaratuz.

Disko Grabaketa

Ostiralean burutuko duen emanaldia grabatua izango da, eta zuzeneko disko bilakatuko da. Honakoa ez da Pettik grabatzen duen lehen zuzeneko diskoa izango, izan ere 2008 urtean Bonberenean grabatu baizuen ‘Awañak’ izeneko lana, non biko formatuan aritu zen Rafa Aceves pianista lagun. 2018an berriz, beste zuzeneko bat grabatu zuen gune berean, honakoan Eneko Dorronsoro eskusoinuan lagun. Ostiralekoa bestelakoa izango da, eta hortaz Etxeko Uzta izango du agertokian lagun, rock banda formatuan arituz bere musika bideko kantuak errepasatuz.