Getxo Folk jaialdiak 40. edizioko kartela osatu du. Rodrigo Cuevas, Richard Bona & Alfredo Rodriguez eta Antonio Zambujo & Yamandu Costa gehitu zaizkie joan den astean iragarritako artista eta taldeei (Buika, Milladoiro, Esne Beltza...), irailaren 11tik 15era bitartean askotariko soinuak izango dituen programazioari forma emateko.

Muxikebarrik ordainezko kontzertuak hartuko ditu (20.00), Areetako Geltokia plazan goizeko (13.00) eta arratsaldeko (18.00 eta 19.30) doako emanaldiak izango dira eta, azkenik, Ereagako aparkalekua gazteei eskainitako saioak egingo dira. Ordainezko kontzertuetarako sarrerak dagoeneko salgai daude Muxikebarri, Romo Kultur Etxea eta Kutxabank sarean.
 
Inaugurazio egunean, irailaren 11n, Muxikebarrin, Antonio Zambujo (1976, Beja) abeslari portugaldarrak eta Yamandu Costa (1980, Passo Fundo) gitarrajotzaile brasildarrak osatutako bikotea arituko da. Bi artista horiek ibilbide luzea egin dute beren herrialdeetan eta portugesezko musika eszenan. Oraingoan, Getxora datoz ‘Prenda minha’ lan berria aurkeztera. Ibilbide horretan, kantu herrikoi lusiar-brasildarrak eta gaztelerazko kantutegia eskainiko dute.
 
Hilaren 13an, ostiralean, jazz eta jazz-fusioaren eszenako bi artistaren txanda izango da, normalean generoaren mugak zeharkatzen dituztenak Afrika eta Kubako musiketara eta World Music-era hurbiltzeko: Richard Bona (1967; Minta) baxu-jotzaile eta abeslari kamerundarra eta Alfredo Rodriguez (1985, La Habana) pianista kubatarra. «Grammy baten irabazlea, Richard Bona jazzaren eta afropoparen eszenako baxu-jotzaile, konpositore eta multiinstrumentistetako bat da, afrikar jatorrira igortzen duen soinu paregabearen sortzailea. Bere musikak kontinenteko tradizioak, kultura, edertasuna eta arazoak jorratzen ditu», nabarmendu dute antolatzaileek.
 
Bestalde, Alfredo Rodriguez musikari-familia batetik dator, eta laster nabarmendu zen bere trebetasunagatik. Bere aita ‘Alfredito’ Rodríguez herrikoiaren eskutik etorri zen herri musikan murgiltzera, eta harekin lan egiten du genero dantzagarrien konponketetan. Ohikoa da mundu osoko jazzaldietan, eta Quincy Jonesek berak babestu zuen, 2007an Montreauxko Jazz Jaialdi ospetsuan aritu ondoren. Harrezkero, ibilbide sendoa egin du, eta, horren ondorioz, Grammy sarietarako izendatu dute, eta bere belaunaldiko piano-jotzaile nabarmenetariko bat bihurtu da.
 
Rodrigo Cuevas Ereagan
 
Hilaren 13ko egunari amaiera emateko, azken urteotan nabarmendu den Rodrigo Cuevas arituko da jaialdian. Artista asturiarra ‘La Romería’ ikuskizun arrakastatsuaren biraren barruan iritsiko da Getxora. «Bertan, diziplina anitzeko sortzaile honek munduko musiketatik eta soinu elektronikoetatik igarotzen diren jai erritmoak hurbilduko dizkio publikoari, kabaret eta zirku diziplinak barne hartzen dituen antzezpenaren bidez», esan dute. Emanaldia Ereaga hondartzako aparkalekuan izango da 22.00etatik aurrera eta sarrera doakoa izango da.