Osasunaren Munduko Erakundea (OME) ostegun honetan bildu da covid-19aren aurkako txertoek eskaintzen duten immunitatea berrikusteko. Bileraren ostean jakinarazi dute datuek erakusten dutela txertoek, gutxienez, 6 hilabeteko immunitatea eskaintzen dutela bigarren dosia hartzen den momentutik (edo lehen dositik Jansssenen txertoaren kasuan).

«Dauden datuak berrikusi ditugu, eta gehienek erakusten dute immunitateak sei hilabete arteko iraupena duela», azaldu du Kate O’Brien OMEko Immunizazio Saileko zuzendariak prentsaurreko batean.

Izan ere, immunizazio aferetan OME aholkatzen duen taldeak azken egunetan batutako datuetatik ateratako ondorioak argitaratu ditu. Hala ere, omicron aldaerak txertoen aurrean nola erreakzionatzen duen esateko oraindik goizegi dela onartu du.

Era berean, aholkularitza taldeak txertaketaren hurrengo faseak malgutasunez planifikatzeko gomendatu die herrialdeei. Testuinguru honetan, joan den astean 4,1 milioi kutsatze berri eta 52.000 heriotza eragin zituen covid-19aren pandemiak mundu osoan zehar.

Aholkularitza taldeak eskatutako malgutasuna ondorengoan datza: herrialdeei eskatzen diete herritarrei txerto baten lehen dosia eta beste baten bigarrena emateko aukera zabalik mantentzeko. Era honetan, txertoen erreserbarik ez duten herrialdeei hornidura arazoei aurre egitea errazagoa egingo zaie.

Beste alde batetik, hainbat herrialde beraien immunizazio planetan lau txerto desberdin izatera iristen dira. «Txerto desberdinak konbinatzeak izakin horien zati bat garaitzea eta galtzea saihestuko du», arrazoitu du O’Brienek. Hala ere, adituek diote, posiblea den neurrian, bi dosietan produktu berdina jartzea dela gomendagarriena.

Alejandro Craviotok, aholkularitza taldeko presidenteak, azaldu duenez, OMEk onartutako txertoek babes sendoa eskaintzen dute sei hilabetez: «Nazioarteko erreferentziatzat hartzen diren erregulatzaile gehienek gutxienez sei hilabeteko babes sendoa eskaintzen dute gaixotasunaren forma larrien aurka, nahiz eta nolabaiteko beherakada [eraginkortasunean] ikusi den koadro larrien aurrean, batez ere adinekoen eta bestelako gaixotasunak dituzten pertsonen artean».

Horregatik, zientzialariek errefortzuzko dosia, hirugarrena, talde zaurgarriei soilik ematean egiten dute azpimarra. Talde zaurgarri horien barruan, gaixotasun larriak dituztenak ez ezik osasun langileak ere sartuko lirateke, bereziki birus inaktibatudun txertoak jaso zituztenak. Txerto hauek Sinovac eta Sinopharm farmazeutikek eskaini zituzten.

Bi farmazeutika hauen txertoak OMEren larrialdiko erabileraren zerrendan daude sartuta eta asko erabili izan dira garapen bidean dauden herrialdeetan, latinoamerikarrak barne.

«Hirugarren dosiak arrisku handieneko taldeei gordetzeak aukera emango lieke herrialde pobreei, txertaketa tasak oso baxuak baitira, behar dituzten txertoak jasotzeko», defendatu du OMEk.