Alberjinia eta otarrainxka budina

Osagaiak 6 lagunentzat
Tipula bat, porru bat, azenario bat, 150 g kuiatxo, 300 g otarrainxka, 2 alberjinia, 5 arrautza, 200 ml esnea, 200 ml esne-gaina, olioa, gatza. Saltsa: 2 tomate heldu, baratxuri ale erdia, pikillo piper bat, ogi xerra bat, 2 koilarakada olio, koilarakadatxo bat ozpin, gatza.

Zailtasuna                        3              

1. Alberjiniak garbitu eta zerrendatan moztu. Gatza bota, ordu erdiz utzi eta xukatu. Zartagin batean olioa berotu eta alberjinia frijitu.
2. Txikitutako tipula olio pixka batekin erregosi, su eztitan.
3. Porruak garbitu eta zerrendatan moztu. Tipularekin batera jarri eta erregosi, su eztitan.
4. Birrindutako azenarioa eta kuiatxoa gehitu eta arin erregosi.
5. Otarrainxkak zuritu eta osorik utzi. Barazkiekin batera jarri eta arin erregosi.
6. Ontzi batean arrautzak, esne-gaina eta esnea jarri eta irabiagailuarekin nahasi. Gatza bota.
7. Budin molde bat gurinez igurtzi eta ogi birrinduz hautseztatu. Moldean hurrenez hurren alberjiniak, otarrainxkak, alberjiniak, otarrainxkak eta alberjinia jarri eta aurreko nahasketarekin estali. Labe beroan sartu, mairu bainuan, 180ºC-an, 40 minutuz gutxi gorabehera.
8. Hozten utzi eta moldetik atera. 12 xerratan moztu.
Saltsa honekin lagundu:
1. Tomateak, piperra eta baratxuria irabiagailuarekin nahasi eta txanotik pasatu.
2. Ogi xerra, olioa eta ozpina gehitu eta nahasi. Gatza bota.