Abenduaren 21erako bigarren kontzertu bat iragarri du Muguruzak, lehenerako sarrerak agortuta

Lehen kontzerturako 8.000 sarrerak berehala agortu dira eta une batzuetan 70.000 eskaera egin dira aldi berean. Bigarren data iragarrita, antolakuntzatik azpimarratu dute ez dela hirugarrenik egongo.

Abenduaren 20ko kontzerturako 8.000 sarrerak berehala agortu ondoren, bigarren data bat iragarri du Fermin Muguruzak: abenduaren 21ean izango da, Bilbao Arenan hori ere. «Ez da hirugarrenik izango», ohartarazi du musikariak berak bere sare sozialetan. Sarrerak ostegunean jarriko dira salgai, goizeko 10.00etan,  www.muguruzafm.eus webgunean.

Zinez penatuta gaurko arazo informatikoengatik.
Pozik, oso pozik 8.000 sarrerak bukatu dituzuelako, baina lotsatuta.
Bigarren kontzertu bat eskainiko dugu Miribillan abenduak 21.
Ez da hirugarrenik izanen.
Sarrera salgai: Apirilak 25, osteguna 10:00https://t.co/jkNsZjEI31 pic.twitter.com/bvF2mebg3l

— Fermin Muguruza (@muguruzafm) April 23, 2024

Astearte honetan, lehen ordutik, ikusmin handia sortu da Euskal Herrian sarrerak eskuratzeko –NAIZeko harpidedunek lehenago eta merkeago erosteko aukera izan dute– eta, antolatzaileek nabarmendu dutenez, une batzuetan 70.000 eskari baino gehiago jaso dituzte aldi berean.

Hamahiru urtez oholtza handi batera igo gabe pasa ostean, 40 urteko musika ibilbidea ospatuko du Fermin Muguruzak abenduan emanen dituen bi kontzertu horietan.

«Aste hori oso esanguratsua izango da, azkenekoz Bilboko Kafe Antzokian izan nintzelako Iñigoren omenez abestuz eta itzulera ere Bilbon izango delako», adierazi du Muguruzak, Iker Gurrutxaga NAIZ Irratiko kazetariari eskainitako elkarrizketan.