Arkume lasagna perretxiko saltsarekin

Osagaiak 4 lagunentzat
12 kaneloi xafla, gazta birrindua. Betegarria: 600 g arkume hanka, tipula bat, 3 baratxuri ale, porru bat, azenario bat, 2 koilarakada tomate saltsa, 100 ml ardo beltz, olioa, gatza. Saltsa: 40 g gurin, 40 g irin, 600 ml esne, 100 g tipula, 200 g perretxiko, gatza.

Zailtasuna                          3

1. Kazola batean ur ugari eta gatza irakiten jarri.
2. Irakiteko puntuan dagoenean, kaneloi xaflak banaka sartu; noizean behin mugitu.
3. Hamar minutuz egosi. Atera eta ur hotzetan busti. Xukatu.
Betegarria:
1. Arkumea zatitu, gatza bota eta irineztatu. Zartagin batean olioa berotu eta haragia gorritu.
2. Presio eltze batean zatitutako barazkiak 10 minutuz erregosi.
3. Arkumea sartu eta ardoa bota. Urarekin estali. Eltzea estali eta  40 minutuz egosi.
4. Arkumea atera eta hezurrak kendu. Barazkiak irabiagailuarekin nahasi eta haragiarekin nahastu.
Saltsa:
1. Eltze batean txikitutako tipula gurinarekin erregosi. Txikitutako perretxikoak gehitu eta erregosi.
2. Irina gehitu eta eragin.
3. Esnea apurka-apurka bota eta etengabe irabiatu. Eragin, etengabe, su eztitan hiru minutuz.
Bukatzeko:
1. Azpil batera saltsa laurdena bota.
2. Hurrenez hurren lasagna xafla, betegarriaren erdia, lasagna xafla, geratzen den betegarria eta lasagna xafla jarri.
3. Saltsarekin estali, gazta bota eta labean  berotu.