Indar entrenamenduaren aurretiko beroketa

Gaurko zutabe honetan, indar entrenamenduaren abiapuntu gisa beroketa on bat egiteak duen garrantzia jorratuko dugu. Denbora faltagatik, monotonoagoa delako edota ohitura faltagatik, luzaketekin batera, indar saioan garrantzi gutxien eman ohi zaion atala dela esango genuke, eta hori akats larria bihur daiteke.

Beroketak helburu ezberdinak ditu. Alde batetik, helburu fisikoak daude, gure gorputzaren eta landu behar ditugun muskuluen tenperatura igotzen laguntzen baitute beroketek, bihotz-maiztasunaren igoera progresiboarekin. Bestetik, helburu psikologikoak ere baditu, gorputza prestatzen duen bezala, gure burua egitear gauden jarduerarako prestatzen laguntzen digu kontzentrazio maila handituz. Amaitzeko, helburu prebentibo bat ere badu, lesioak ekiditen lagunduz.

Honela, saioaren atal honen egitura gauzatu behar dugun saioaren ezaugarrietara egokitu behar da. Oso ohikoa da indar entrenamenduaren aurretik eliptikan, zintan edota bizikletan lan kardiobaskular motz bat egitea, baina gero indar-lan espezifiko bat egin behar badugu -goi ataleko hipertrofia lana, gluteoko indar lana edota belauneko lesio baten berregokitzea- ez da beroketa egokiena.

Beraz, beroketa lanaren egitura egokia hiru atalez osatuko genuke. Lehenik eta behin, foam roller delakoaren laguntzaz landu behar ditugun giharrak aktibatu behar ditugu automasaje baten bitartez; aldi berean, tentsioak askatu eta giharren irrigazioa handituko dugu. Bigarren pausoa landu behar ditugun mugimenduen mekanika hobetzea da, artikulazioen mugikortasuna handituz, mugimenduaren oztopoak ekiditeko. Hirugarren fasean giharren aktibazio espezifikoa egin behar da; hau da, mugimenduaren mekanika errepikatuz karga progresiboak mugitu eta pixkanaka giharrek jasaten dituzten tentsioak handitu patroi espezifiko horretan.

Laburtuz, indar-entrenamenduetan beroketa espezifikoa egitea oso garrantzitsua dela azpimarratu nahi dugu, entrenamenduari etekin handiagoa ateratzeko eta denbora galera ez bilakatzeko. Horrek errendimendua hobetzen lagunduko digu eta proposatutako helburuak lortzen, bai eta lesioak, tentsio muskularrak eta minak ekiditen, gorputza egin behar duen jarduerarako behar bezala prestatuz.