S. apurgarria,

Noiztik ez duzu ezinezkorik irudikatu? Ametsak eta aukerak nahasten dituzu etengabe. Tarteka ametsak betetzen dituzula sinesteko duzun bide bakarra da. Inori ez zaio beti galtzea gustatzen. Horregatik, udan, Alice Munroren ipuinetara itzuliko zarela erabaki duzu. Benetako poza zerk pizten dizun topatu nahi zenuke, arrazoira zure kabuz ala inguruaren eraginez iristen zaren jabetu, zure emisio gutxiko eremura sarbidea nori baimentzen diozun igarri. Ezingo duzu beti besteen arabera jokatu, beti besteei huts egiteko lotsaz bizi.

N. eta E.ren urteguna da gaur, jaietarako prestatzen ari da auzoa, eta oporretarako zenbat falta den galdetu dizu seme gazteenak. Nolakoa litzateke zure bizitza egunkaririk eta albistegirik jarraituko ez bazenu? Zertaz hitz egingo zenuke parkean? Nondik irakurriko zenuke mundua? Zure baitako mamuak domatzeko ala dogmatzeko behar duzu harrabotsa? Irudikatu zaitez Hendaiako hondartzara “a Francia” doazen gertukoekin Ziburuko liburu eta disko azokaz mintzo. Imajinatu zaitez Israelgo armadan soldaduska egitera doan emakumearen istorioa kontatzen duen Paulina Tuchschneider-en “La Soldada” aurreiritzirik gabe leitzen. Errazagoa da Europako Parlamenturako hauteskundeekiko indiferentzia sentitzea eta, hala ere, bozkatzera joatea.

Indiferentziarik gabe, esadazu: nolakoa litzateke zure bizitza, lanaz eta diruaz arduratu behar ez bazenu? Non jarriko zenuke begia? Beldurrari desirak gaina hartuko liokeela uste duzu ala, ezinbestean, askatasunak beldurra eragingo lizukeela? Ez litzateke itxuraz egoera optimoan egonik animoa hondoraino jausten zaizun lehen aldia. Zergatik kexatzen zara, bestela? Osasunez sano zaude, maite duzun jendez inguratuta bizi zara, gustuko langintzan diharduzu, orain arte bizitzak ez zaitu gehiegi kolpatu... Nik ere jakin nahi nuke nondik datorkizun kabitu ezin hau eta, aldi berean, zein den abentura berrietarako saltoa eragozten dizun balazta. Aukerarik ez daukazula erantzuten didazunean, ametsak bukatu zaizkizula onartzen ari zara, akaso. Zuen ahalen gainetik bizi omen zinetenak zuen ametsen azpitik hilko zarete, agian.

Baliteke hau ez izatea irudikatu zenuena. Baliteke irudikatu zenuena gustukoa ez izatea. Baliteke irudikatzen ez asmatu izana. Baliteke zure gustua zein den ez jakitea. Baliteke oraindik aukera bat izatea... Edo amets bat.