Gabriel García Márquez idazlearen inguruan antolatutako jardunaldiak Montevideoko Intendentziaren Kultura zuzendari Maria Ines Obaldiak eta Montevideo Antzokiko zuzendari Malena Muyala Solisek aurkeztu zituzten Uruguaiko antzoki historikoan egindako ekitaldian.

Obaldiaren arabera, “Macondo” Gabriel Garcia Marquez idazle kolonbiarra omentzeko plataforma bat izango da, ikuskizun nagusi bat izango duena, baina, ondoren, hainbat lurralde artistikotara zabalduko dena.

«Kasu honetan, García Márquez omentzea helburu duen esperientzia sakona da, baina egilea bera gainditzen du, batez ere Latinoamerikako literaturari begira», azpimarratu du Kulturako zuzendariak.

Bestalde, Muyalak zehaztu du Comedia Nacional-eko zuzendari Gabriel Calderón-en ideia batetik sortu zela proiektua, honako erronka honekin: «García Marquez bezalako artista bat omentzea». Montevideoko antzerki-talde egonkorra da Comedia Nacional.

Lan-sare indartsua

Horrek guztiak «lan-sare» indartsua behar du, hainbat arte-talde eta tokiko gobernuko sailen artean, eta baita Kolonbiako enbaxada eta Gabo Fundazioa bezalako elkarteen babesa ere.

Antolatzaileen arabera, 1982an Literatura Nobel saria irabazi zuen egileak sortutako Fundazioa Montevideon egongo da, Bogotan urtero 10.000 pertsona baino gehiago biltzen dituen Gabo Jaialdiaren «bertsio txiki batekin».

Bestalde, “Macondo” lanaren aurkezpenean, Marianella Morena antzerki-zuzendariak proiektu artistikoaren inguruko aurrerapena eskaini zuen. Paula Villalba uruguaiarrarekin batera zuzendutako lanak keinu bat egiten dio García Marquezek “100 años de soledad” eleberri ospetsuan sortutako fikziozko herriari.

«Ikusleak Solisera iritsiko dira eta, zelaigunea zapaldu bezain laster, Macondo esperientzia hasiko da. Ibilbide hori kolektiboa bada ere, banakoarentzat ere pentsatuta dago, liburua irakurtzen dugunean esperientzia intimoa izaten dugun bezala», azaldu zuen.