Eraztuntze zientifikoaren erakustaldirako bi jardunaldi antolatzeaz gain, ibilaldi gidatua ere prestatu du Urdaibai Bird Centerrek urriaren 15ean Hegazti Migratzaileen Mundu Mailako Eguna ospatzeko, parte-hartzaileek “Next Generation” kontserbazio-proiektuaren barruan egiten ari diren ekintza guztiak ezagutu ditzaten. Ibilaldia Urdaibai Bird Centerretik abiatuko da 10:30ean.

Eraztuntzerako eta ibilaldirako plazak mugatuak dira eta izena eman beharko da Urdaibai Bird Centerreko telefonora deituta.

Antolatzaileen esanetan, Hegazti Migratzaileen Munduko Eguna sentsibilizazio-kanpaina bat da, urtero hegazti migratzaileak eta haien habitatak kontserbatzeko beharra nabarmentzen duena. Mundu-mailakoa izanik, tresna eraginkorra da hegazti migratzaileek jasaten dituzten mehatxuei, haien garrantzi ekologikoari eta horiek kontserbatzeko nazioarteko lankidetzaren beharrari buruzko kontzientziazio globala areagotzen laguntzeko.

Leloa “Ura” da

2023ko Hegazti Migratzaileen Munduko Egunaren leloa “Ura” da, funtsezkoa gure planetako bizitzarako. Hegazti migratzaile gehienak ekosistema urtarren mende daude beren bizi-zikloetan. Barrualdeko eta kostaldeko hezeguneak, ibaiak, lakuak, errekak eta padurak ezinbestekoak dira habiak egiteko, atseden hartzeko eta edateko, bidaia luzeetan.

Uretako ekosistemak gero eta mehatxatuagoak daude, eta, ondorioz, baita haien mende dauden hegazti migratzaileak ere. Giza ur-eskari gero eta handiagoak, kutsadurak eta klima-aldaketak eragin zuzena dute ur garbiaren eskuragarritasunean eta hegazti migratzaile askoren kontserbazio-egoeran.