Sarrerak jaitsi egin dira EAEko landa ostatuetan eta gehitu apartamentu turistikoetan
Sarrerak %0,3 gutxitu dira Euskal Autonomia Erkidegoko landa ostatuetan 2024. urtean, apartamentu turistikoetan %21,1 gehitu diren bitartean, Eustat euskal estatistika erakundeak landutako datuen arabera.
![EAEko apartamentu turistikoetan 214.157 sarrera eta 719.936 gaualdi izan dira.](/media/asset_publics/resources/001/200/218/article_main_landscape/maleta.jpg)
EAEko landa ostatuetan 172.341 sarrera eta 445.501 gaualdi zenbatetsi dira 2024an, aurreko urtean baino %0,3 eta %0,2 gutxiago, hurrenez hurren. Atzerriko bisitariak mota horretako establezimenduetako sarrera guztien %25,9 izan dira, 2023an baino %3,2 gehiago.
Lurraldeka, sarrerak %8,2 gehitu dira Arabako landa ostatuetan; Gipuzkoa eta Bizkaikoetan, berriz, %1,8 eta %2,7 jaitsi dira, hurrenez hurren. Antzera, Araban gaualdiak %3,0 igo dira, eta Gipuzkoan eta Bizkaian, aldiz, %0,1 eta %2,1 jaitsi, hurrenez hurren.
EAEko landa ostatuetako batez besteko egonaldia 2,58 egunekoa izan da 2024an, aurreko urtekoaren berdina. Okupazio maila, bestalde, %29,2an kokatu da plazen arabera neurtuta eta %33,9an gelen arabera neurtuta, aurreko urtean baino %0,3 eta %1,1 puntu gehiago, hurrenez hurren.
Bestalde, EAEko apartamentu turistikoetan 214.157 sarrera eta 719.936 gaualdi izan dira, eta aurreko urtearekiko hazkundeak %21,1ekoa eta %14,8koa izan dira, hurrenez hurren.
Atzerritar jatorriko sarrerek %31,5eko igoera izan dute urtean zehar, eta EAEko apartamentu turistikoetan izandako guztizkoaren %38,9 izan dira, 2023an izandako %35,8aren gainetik.
Lurraldeka
Lurraldeka, sarreren portaera ez da homogeneoa izan: %32,0 jaitsi dira Araban, eta Bizkaian eta Gipuzkoan, berriz, %29,1 eta %20,9 igo. Aitzitik, ostatu gauen kopuruaren hazkundea orokorra izan da: %8,1ekoa Gipuzkoan, %11,1ekoa Araban eta %22,8koa Bizkaian.
Plazen okupazio mailak %2,3 puntuan gainditu du 2023koa EAEko apartamentu turistikoetan, eta apartamentuen okupazio mailak, berriz, %3,6 puntu egin du gora, 2024an %39,4 eta %65,9 izanik, hurrenez hurren.
Azkenik, EAEko aterpetxe turistikoei buruzko datuak argitaratu diren lehen urtea igaro da, eta 2024ko balantzean ikusten da aurreko urtearen aldean %12,6ko hazkundea izan dela sarreren kopuruan eta %12,8koa gaualdienean, 250.183 sarrera eta 452.561 ostatu gau zenbatetsita.
Sarreren urteko igoera %18,7koa izan da Bizkaian eta %8,3koa Gipuzkoan; Araban, aldiz, %28,3 jaitsi da. Gaualdiek %19,1 egin dute gora Bizkaian eta %7,3 Gipuzkoan, eta %24,8 behera Araban.