Jazza, Bilboko zenbait auzotara hurbiltzeko aitzakia aproposa

Beti aurki daiteke aitzakiaren bat Bilboko auzoak bisitatzeko, baina kultur ekimenek erakargarriago egiten dituzte sarritan irteerak. Egunotan, adibidez, Bilbao Distrito Jazz jaialdia ospatuko da Bidebarrietako liburutegian, Bertendona institutuan eta Errekalde, Begoña, Otxarkoaga eta Deustuko udaltegietan.

Bilboko Udalak eta Bilbaina Jazz Club elkarteak elkarlanean antolatzen duten Bilbao Distrito Jazz programaren 2024ko edizioa ospatuko da otsailean eta martxoan. Guztira, sei kontzertu eskainiko ditu.

Zehazkiago, zikloa otsailaren 9an hasi eta martxoaren 15ean bukatuko da. Emanaldi guztiak ostiraletan izango dira, martxoaren 9koa izan ezik, larunbatean izango baita.

Programaren helburua da jazz musikako zuzenekoak hiriko auzoetara hurbiltzea, generoan «erreferente» diren artisten eskutik. Aurtengo edizioan honako hauek hartuko dute parte: Elixir-Mula Vol 3, Ainara Ortega & Joaquin Chacon, Tony Glausi Quartet, Xavi Torres Trio, Organ Freeman eta Irene Reig Trio.

Hainbat lekutan

Kontzertu guztiak 19:00etan hasiko dira eta sarrerak salgai daude dagoeneko www.bilbaokultura.eus webgunean, 5 euroan. Gainera, sarreren %20 ordubete lehenago jarriko dira salgai areto bakoitzaren atean. Kontzertuak Bidebarrietako liburutegian, Bertendona institutuan eta Errekalde, Begoña, Otxarkoaga eta Deustuko udaltegietan egingo dira.

Hasieran planteatu zen bezala, jazz musikarekiko eta, oro har, zuzeneko musikarekiko zaletasuna sustatzea du helburu ekimenak.

Eta, urteak pasa ahala, lortu du helburua, gero eta jende gehiago hurbiltzen baita Bilboko Udalak eta Bilbaina Jazz Club elkarteak antolatutako kontzertuetara.