Fuji mendia bisitatzeko tasak eta mugak ezarriko ditu Japoniak

Japoniak bisitari murrizketa berriak ezarriko ditu aurten Fuji mendian, gehiegizko turismotik babesteko. Bisitariek ordaindu egin beharko dute mendi enblematikoaren ibilbideetako batetik oinez igo nahi badute.

Fuji mendiak gorakada izan du bisitari kopuruari dagokionez, eta horrek zaborrarekiko eta txangozaleen segurtasunarekiko kezka areagotu du. Mendia garbitzen eta zaintzen laguntzeko, agintari japoniarrek eguneroko bisitarien tasak eta mugak ezarri dituzte bidezidorrik ezagunenean. Neurriak 2024ko uztailaren 1ean jarriko dira indarrean.

 Yoshidako bidezidorra da igoerarik ezagunena, erraztasunari eta ostatua eta otorduak eskaintzen dituzten mendiko babeslekuen maiztasunari esker. Japoniako Yamanashi prefekturaren Gobernuak –Unescok Gizateriaren Ondare izendatutako leku honetan mendi-ibiliak ikuskatzen dituenak– beharrezkotzat jo du bidesaria ezartzea ingurumena babesteko. Era berean, egunero muga bat aplikatzen ari da Yoshida bidezidorretik mendira igotzeko baimena duten pertsonen kopuruari, pilaketa arintzeko.

Egunean 4.000 baino gehiago ezingo dira igo uztailaren 1etik aurrera, 70 eguneko udako eskalada denboraldia hasten baita. Eskalatzaileei ere debekatu egingo zaie igoera arratsaldeko 4etatik goizaldeko 2ak arte. 

Iaz, Yoshida bidezidorrak «aurrekaririk gabeko» eskalatzaile kopurua erregistratu zuen, Japoniako Gobernuaren arabera, eta aurten ere antzeko jendetza espero dute. 2023an, 221 322 eskalatzaile igo ziren Fuji mendira, eta erdiak baino gehiagok Yoshida bidezidorra erabiltzea erabaki zuten. Bisitarien kopuruak gora egin duenez, zaborra pilatu da eta auto-ilarak sortu dira, istripuak eta lesioak eraginez.

Gainera, gailurretik gertu zailtasunak izaten dituzten esperientziarik gabeko txangozaleek ere kezka sortzen dute.

Zenbat kostatuko da Fuji mendira igotzea?

Agintariek oraindik ez dute prezioa jakinarazi, baina laster esango omen dute. Yoshidako bidearen sarreran burdin hesi bat jartzea aurreikusi da, bertan bidesaria kobratzeko.

Agintariek diotenez, bildutako dirua bidezidorrean zehar babeslekuak eraikitzeko erabiliko da, baita erupzio bolkanikoa gertatuz gero ere eta mendi-ibilien ibilbidea behar bezala mantentzeko. Dena den, 2014tik, mendietara edozein bidezidorretatik igotzen diren alpinista asko animatzen dira pertsona bakoitzeko 1.000 yen (6,20 euro) borondatez ordaintzera lekua kontserbatzeko.