Karolinska Institutuak 1873an espoliatutako 82 garezur itzuli dizkio Suediak Finlandiari

Suediako Karolinska Institutuak 82 garezur itzuli dizkio Finlandiari, Gustaf Retzius zientzialari suediarrak 1873an Eskandinaviako herrialdeko zenbait hilerritatik baimenik gabe lurpetik atera zituenak.

Garezurrak aberriratu zituzten Finlandiako eta Suediako agintariek Karolinska Institutu ospetsuarekin zenbait urtetan izandako negoziazioen ondoren. Karolinska Suediako ikerketa medikoko zentrorik handiena da, urtero Medikuntzako Nobel Sariaren irabazlea aukeratzeko ardura duena.

Finlandiako Gobernuaren arabera, irailaren hasieran lurperatuko dituzte berreskuratutako gorpuzkiak, duela 150 urte baino gehiago hobitik atera zituzten elizetako hilerrietan, Finlandiako erdialdeko lau udalerritan.

Gustaf Retzius eta bere aita, Anders Retzius, izen handiko zientzialariak izan ziren bere garaian eta anatomia irakasleak Karolinska Institutuan. Interes berezia zuten «deskubritzeko» gizaki-arraza desberdinak daudela.

Biek ala biek giza burezurren neurketan zentratu zituzten beren ikerketak, arrazen arteko desberdintasunak zehazteko metodo kuantitatiboak sortzeko itxaropenarekin, gaur egun legez kanpokotzat edo etika gutxikotzat jotzen diren prozeduren bidez giza hondakinak bilduz.

Finlandiarren garezurren bila

Horretarako, Gustaf Retzius Finlandiara joan zen bere taldearekin, finlandiarren garezurren bila; uste zuen arraza nordiko edo germaniarra baino maila bajuagokoak zirela. Eta uste horrek hamarkada batzuk geroago nazismoa sortzen lagunduko zuen.

Finlandian espoliatutako 82 garezurrak Karolinska Institutuaren bildumaren parte izatera igaro ziren. Gaur egun, jatorri desberdineko 800 bat giza hondakin daude bertan.

Erakunde honek, 1810ean sortua, bere webgunean aitortzen du XIX. mendean nagusi zen ordena kolonialaren eraginpean egon zirela bere irakasle eta ikertzaileak eta batzuk, gaur egungo ikuspuntutik, «antizentifikoak, antidemokratikoak edo arrazistak» izan zirela.