‘Azaroa: Erakustaldien hilabetea‘ programa, martxan La Encartada fabrika-museoan

Bizkaiko Foru Aldundiak kudeatutako La Encartada Fabrika-Museoak ‘Azaroa: Erakustaldien hilabetea’ ekimenaren beste edizio bat eskainiko du azaroan. Guztira, lau bisita berezi antolatu ditu ehun-fabrikako makina historikoen funtzionamendua zuzenean erakusteko.

La Encartada Fabrika-Museoak antolatutako ‘Azaroa: Erakustaldien hilabetea’ ekimenean artisau-lanbideetan eta industria-tekniketan adituek parte hartuko dute. Bizkaiko industria- eta ehun-ondareari balioa emateko diseinatuta dago ekimena.

Programa azaroaren 9an hasiko da, Ehungailuaren bilakaera izenburupean. Soledad Santistebanek eta Joaquín Marco Saenz de Ormijanak parte hartuko dute jardueran. Bi saiotan, 11:00etan eta 12:30ean, artisau-ehunetatik ehungailu automatikoetarako trantsizioa jorratuko da. Soledad Santisteban ehungintzako ikertzaile eta artisauak eskuzko ehungailu bateko bilbe eta irazki bidezko ehunaren printzipioak azalduko ditu, eta Joaquín Marcok, berriz, La Encartadako makineriaren zaharberritzaileak, ehungailu mekanikoaren funtzionamenduan jarriko du arreta, haren bilakaera teknikoaren ikuspegi zehatza emanez. 8 urtetik gorakoentzat izango da, eta 50 minutuko iraupena izango du.

Ehungintzan giltzarria

Azaroaren 16an, XIX. mendeaz geroztik ehungintzan giltzarria izan den Jacquard Ehungailu bat abian jartzea izango da jarduera nagusia. Ondoz ondoko hiru saiotan, 11:00etan, 12:00etan eta 13:00etan, Laurentino de Cabo Cordero artisauak eta espezialistak ehun urtetik gorako ehungailu horren funtzionamendua erakutsiko du. 2011n zaharberritu zuten eta bere garaian oihalak egiteko erabili zuten. La Encartada Fabrika-Museoak izan zuen hiru Jacquard ehungailuetako bat da.

Erakustaldien zikloak azaroaren 23an jarraituko du, fabrikako Tailer Mekanikoan lan egiten duen eta Industria Ondarearen Euskal Elkarteko kidea den Miguel Ángel Martínez Vitoresen eskutik. Bi saiotan, 11:00etan eta 12:30ean, museoko makinetako bat zaharberritzeko beharrezkoa den pieza berri bat diseinatu eta fabrikatzeko prozesua erakutsiko da. Erakustaldi horri esker, zuzenean ikusi ahal izango da tailer mekanikoko lana, funtsezkoa izan baitzen ehungintzako makineria konpontzeko eta mantentzeko.

Hilabetea ixteko, azaroaren 30ean, manten eta oihalen tratamenduan funtsezkoak izandako bi makina jarriko dira martxan: kardo naturaleko Snoeck esekigailua eta ehuna moztu eta maila orekatuan jartzeko ontzeko makina. Biak funtsezkoak dira ehungintza-lanak ondo amaitzeko, eta Joaquín Marco Saenz de Ormijanak bi saiotan aurkeztuko ditu, 11:00etan eta 12:30ean.

Esekigailua 1905ekoa da, eta kardo naturalak erabiltzen ditu artilearen ilea altxatzeko; ehuna ontzeko makinak, berriz, ateratako ilea ebakitzen du, eta ehunari azken testura ematen dio. Prozesu hori ia aldatu gabe mantendu da urteen poderioz, eta lehen aldia izango da jendaurrean jartzen direla, erakustaldien edizio honetan.

Informazio praktikoa eta erreserbak

Erakusketetarako sarreraren prezioa 3,50 eurokoa izango da pertsonako, eta doakoa izango da 12 urtetik beherakoentzat. Gainera, 7eurokoko tarifa konbinatua eskainiko zaie, erakustaldiarekin batera, museora bisita gidatua egin nahi dutenentzat. Plazak mugatuak dira, eta, beraz, ezinbestekoa da aldez aurretik erreserba bat egitea 946 800 778 telefono zenbakira deituta edo laencartada@bizkaia.eus posta elektronikoaren bidez.

Bizkaiko Foru Aldundiak, La Encartada Fabrika-Museoaren programa horren bidez, Bizkaiko industria-ondarea kontserbatzeko, balioesteko eta zabaltzeko konpromisoa indartzen du, eta aukera paregabea eskaintzen du Bizkaian ehungintza-industria bultzatu zuten historia eta teknologia hurbiletik ezagutzeko.