Lopetegi gazteak irabazi zuen herenegun arratsaldean jokatu zen Mallabiko Torneoa, eta kirolari honek 18 urte besterik ez ditu. Harri txikiekin oso trebea da, eta garbi utzi zuen hemendik aurrera maila honetan bera menderatzeko lan asko egin beharko dela.

Amaieran berdinduta bukatu zuen Urruzunorekin, baina kasu hauetan bi kirolariak pisatu egiten dira, eta bietan arinena denak irabazten du, eta Lopetegik 87 kilo pisatu zituen, eta 98 Urruzunok, eta horrek eman zion txapela zarauztar gazteari.

Kirolari bakoitzak 100 kiloko zilindro zaharra eta pisu bereko bola erabili zituen, eta bost minutuko txanda bakar bat izan zuten. Hasieran zazpi ziren aritzekoak, baina azkenean Izeta III.a eta Urrutia falta izan ziren, biak ere min hartuta.

Lopetegik 54 jasoaldi eman zizkion zilindroari, eta 37 bolari, guztira, 88 jasoaldi lortuz. Urruzunok ere beste horrenbeste jasoaldi lortu zituen. Zilindro zaharrari 51 eman zizkion, eta 37 bolari, eta biak amaieran berdinduta geratu ziren, baina aurrez aipatu bezala, Lopetegik eraman zuen txapela. Garaipen horrek indarra emango dio.

Hirugarren postua beste gazte batek eraman zuen, Eizagirrek, 44 eta 29 jasoaldi eman baitzizkion, zilindro zaharrari eta bolari, guztira, 73 jasoaldi. Laugarren postua Aimar Galarragarentzat izan zen. Berak 68 jasoaldi lortu zituen denera. Zilindroari 40 eman zizkion, eta 28 bolari, eta sailkapena Eizagirrek itxi zuen. Berak denera 56 jasoaldi lortu zituen. 34 eman zizkion zilindro zaharrari, eta 22 bolari.

Aizkora

Urrezko Aizkorako Txapeldunen Ligako neurketa jokatuko da gaur, Gernikan, 19.00etan. Bertan aurrez aurre izango dira Aitzol Atutxa eta Jon Rekondo. Atutxa da lehiaketa honetan orain arte lehiaketarik gutxien jokatu dituen aizkolaria, eta hemendik aurrera jokatzen diren saiorik gehienetan aritu beharko du. Bizkaitarrak herenegun Urrezko Kopa irabazi zuen, eta indarrez gainezka joango da Gernikako saiora. Irabazteko faboritoa izango da.