Ustekabeko finala izango du Larresoroko Torneoak

Ustekabeko finala izango du bihar Larresoroko Torneoak; izan ere, ez Ducassou eta ez Larralde ez dira bertan lehiatuko. Udako eta denboraldiko izarrak izan dira beraiek, baina biek galdu egin zituzten finalerdietako norgehiagokak, eta ez dira egun handian arituko.

Aurreneko finalerdian, Ospital eta Ezkurra gailendu ziren 40 eta 20 Larralderen eta Amuleten aurka. Oraingoan Larraldek aurrean berak baino urte bat gazteago den bat izan zuen, Ospital, goian ibili behar duen beste bat, eta aurre hartu zion, baina gakoa atzean egon zen, Ezkurra bikain aritu baitzen.

Bigarrengoan, Lanbert anaiek 40-36 irabazi zieten Monzeri eta Ducassouri. Partida estua izan zen, baina amaieran lanbertarrak hobeto aritu ziren. Partida erabakigarria bihar jokatuko da, 18.00etatik aurrera.