JAN. 06 2017 Benoit Hamon hautagaia Euskal Herriko prozesuaren alde agertu da GARA BAIONA Benoit Hamon ezkerreko primarioetako hautagaiak Euskal Herrira egindako bisita baliatu du Bake Bidea eta Bizi mugimenduetako kideekin elkartu eta bake prozesuari buruzko iritzia emateko. Kazeta.naiz.eus-ek asteazkenean jasotako adierazpenetan, Hamonek Estatu frantsesa ETAren desarmatzean «engaiatu behar» dela esan zuen. Desarmatze hori burutu ahal izateko eztabaidatzeko prest izango dela nabarmendu zuen, «Estatu frantsesaren ardura aterabide bat atzematea» dela aipatuz. Bere iritziz, «jendarte zibilak aitzinatzeko borondatea erakusten duelarik, eztabaida bultzatu behar da». Gisa berean, euskal presoak hurbiltzearen alde agertu zen, eta familien eskaerak kontuan hartu behar direla aipatu zuen. Gainera, elkarrizketa bideak irekitzea funtsezkoa dela adierazi zuen.