Grenobleko hiru errugbilarik bortxatu zutela salatu du Baionako neska batek

Erasoa larunbatean jazo zen Bordelen, Grenobleko errugbi taldeak bertakoen kontra partida jokatu ostean, baina ustezko biktimak astelehenean salatu zuen. Bere esanetan, diskoteka batean ezagutu zituen Grenobleko jokalari batzuek hotel batera eraman zuten, drogatuta eta indarrean, eta han bortxatu egin zuten. Atzo jakin zen erasoa jasan zuen gaztea Bordelen ikasten ari den 21 urteko neska baionar bat dela. Jazoera han gertatu zen arren, Grenobleko fiskaltzaren gain geratu da ikerketa. Salaketa konfirmatzen bada, jokalarien kontrako neurriak agindu ditu taldeko zuzendaritzak.