Matrikulazio aurreko egun hauek ez dira atseginak izaten; 90. hamarkadan haustura eta mina sorrarazi zuen publifikazio prozesua gogora ekartzen dute maiz. 

Euskal ala publiko kontzeptuan, indarra non jarri eztabaidatzen joan zitzaigun aukera hura. Hezkuntza komunitatean ez genuen kontsentsurako nahikoa indar egin eta, hala, aldebakarreko lege politikoek egun indarrean dugun hezkuntza ereduen eta sareen banaketarako Euskal Eskola Publikoaren Legea eta Funtzio Publikoaren Legea ezarri zizkiguten.

Azken egunotan entzun eta irakurri ditugunak, eskola aldarrikatzeko moduak, aurreko garaira narama. Ikastola Nafarroa eta Iparraldean justifikatua dago, gainontzean, segregatzailea dela diote. Froga ezazu! Hitzetatik ekintzara eramazu! Etor zaitez ikastolara! Matrikula ezazu gurean! Egoera zaurgarrienean zaudena bazara ere, ongi etorria izango zara. Zurea da erabakia!

Erabakia hartzeko, zure inguruan dituzun ikastetxeen bertuteak aztertzea proposatzen dizut. Ikastetxe guztiok hutsuneak, ahuleziak, hobetu beharrekoak ditugu. Baina gure bertuteak nahiz balioak garrantzitsuagoak eta indartsuagoak dira; aztertu, ikertu, balioetsi, ondorioztatu… erabaki.

Zenbait ez gaude inolaz ere harro egun dugun Euskal Eskola Publikoaren Legeaz. Herri batek hiru administrazioen baitan duen eskola banaketa ez dugu maite. Kontzertazio sistemak edota hainbatetan herritarren interesekin talka egin duen administrazioaren titulartasuna duen eskolak ez du gure desioa bermatzen. Publikoa jabegotza baino haratagoko kontzeptua dugu eta euskal, artikulu askotan desagertzen den substantiboa, euskaraz aritzea baino gehiago. 

Legea erditzen ari zen garai hartan, publiko aukeran, udal-eskola garatzen saiatu ginen, ez baita arrotza guretzat. Gurean, udal ordezkaria zuzendaritza batzordeko eta batzarreko parte da aspaldidanik. Kudeaketa guztiaren zuzeneko berri du udalak, bertatik bertara.

Asko dugu hobetzeko, asko ikasteko. Bitartean, begira diezaiogun hurkoari eta ikasi bere bertuteetatik; baliabide gehiago eta hobeak eska eta lor ditzagun. Gutxi gastatzeagatik zorionduak izaten direnen aurrean, gasta dezagun beharrezkoa dena etorkizunean ongi inbertitzeko. Guztiok egin dugun berrikuntza, lana eta esfortzua aitortuta, zenbaitek adierazi duen moduan, azken 50 urteotako argazkiak alderatuz gero, eskola baita gutxien aldatu dena.

Ea behingoz gai garen hiru administrazioak gainditu eta bertako Euskal Eskola Publiko bakarrean biltzeko! Ikasketa publiko horretan bidelagun izango gara!