«Euskaraz ikastea ez zen inportanteena hasieran; bikain iruditzen zait orain»

Kepa Garat da EHUko Medikuntza ikasketetan sartzea lortu duen Baionako Bernat Etxepare lizeoko lehenengo ikaslea. Azken urteetan Hego Euskal Herrian ikasi ahal izateko desmartxa erraztu diete Ipar Euskal Herriko ikasleei eta, horri esker, gero eta gehiago dira Bidasotik hegoaldera euskaraz ikasten segitzeko asmoz urratsa egiten dutenak. Kazeta.eus-i kontatu dio bere esperientzia Garatek.

Zergatik erabaki zenuen Euskal Herriko Unibertsitatean Medikuntza ikastea?

Nire amak jakin zuen nola pasatzen zen Hegoaldean. Arrebak konkurtsoa huts egin zuen frantziar Estatuan eta aterabide bat bilatu zuen. Erran zidan ongi pasatzen zela Hegoaldean. Hara joan naiz batez ere konkurtsoa ez egiteko.

Azal dezakezu nola pasatzen den EHUn sartu ahal izateko?

Sartzen zara baxoko notarekin. Nik baxoan 16,9/20ren gain ukan dut, eta EHUn sartu ahal izateko 13,06 lortu dut 10en gain. Asko aldatu da sartzeko prozedura. Lehen, baxoko nota bitan zatitzen zuten. Jakin behar da Hegoaldeko opzioak ez direla frantziar Estatuan bezala ibiltzen. Haiek egiten dute selektibitatea 10en gain eta puntu baten gain opzio bat, bi punturen gain beste opzio bat… Orotara, badituzte lau puntu opzioekin irabazteko.

Duela guti aldatu dute mekanismoa eta koefizienteak plantan eman dituzte. Gainera, lehen, opzioak pasa behar ziren Hego Euskal Herriko programa kontuan harturik. Horrek esan nahi zuen bi programak ikasi behar zirela urte berean. Ezinezkoa. Baina duela urte batzuk baxoko nota bat opzio gisa hartzeko aukera eskaini zuten. Horrek erran nahi du nota horrek balio bikoitza duela. Adibidez, Biologiako nota aukeratu eta, baxoko nota orokorrean kontuan hartua izateaz gain, opzio gisa ere kontuan hartua da. Modu horretan, puntuak irabazten dira.

Argi zenuen EHUn ikasi nahi zenuela?

Ez batere. Hasieran Aeronautikako arloan sartu nahi nuen. Medikuntza egitea erabaki nuelarik, hasieran ez zen euskararentzat. Jakik, lizeoko orientatzaileak, eta lizeoko irakasle batzuek erraten dizutena da EHUn ikasiz euskaraz segitzeko aukera dugula. Niretzat ez zen inportanteena. Nahi nuen etxetik hurbil ikasi. Konkurtsoa ez pasatzea ere bikaina zen. Hilabete pare bat pasa ondotik, euskaraz segitzea bikaina iruditzen zait. Beste lagunak frantsesez ikasten ikusten ditut, eta ez dit gogorik ematen. Jakik eta lizeoko beste irakasleek arrazoi zuten.

Medikuntza fakultatean ikasgai guztiak euskaraz dituzu?

Bai. Ariketa batzuetan, Psikologian adibidez, gaztelerazko bideo batzuk ukan ditugu, baina orokorrean dena euskaraz egiten dut. Nire gaztelera maila oso txarra da, baina hala ere moldatzen naiz. Uste dut hirugarren urtera arte dena euskaraz dela. Ikasturte hasieran bilkura bat ukan genuen dena azaltzeko. Dena euskaraz dela esan ziguten, salbu laugarren urtean badirela gauza batzuk gazteleraz. Erran ziguten espero dutela gu laugarren urtera heltzean dena euskaraz izango dela.

Erraza izan da prozedura administratiboa EHUn sartu ahal izateko?

Lizeoak asko lagundu gaitu. Pixka bat pisua zen. Kasik ez naiz EHUn sartu, paperengatik. Beste eskola guztietan ez dute euskara agiria eskatzen, hots, EGA edo B2. Justu Medikuntza egiteko euskarazko diploma eskatzen dute eta lizeoak hori ez zekien. Opzioak hartu nituenean Medikuntza hautatu nuen euskaraz lehen opzio gisa eta Medikuntza gazteleraz bigarren opzio gisa, baina ez nuen inoiz pentsatzen hori egingo nuenik.

Ukan nuen email bat errateko onartua nintzela. Leioara joatean, ohartu nintzen gazteleraz hartua nintzela. Administraziokoek erran zidaten ez zela posible aldatzea, baina errekurtsoa pausatu ondotik eta nota onak nituenez, lortu nuen.

Paperentzat aski pisua zen beti ziurtagiri bat aurkeztu behar delako. Hala ere, aspergarriena da webguneetan informazioa atzematea. Hegoaldeko webguneak ez dira errazak ulertzeko.

Merezi du oztopo horiek gainditzea euskaraz Medikuntza ikasi ahal izateko?

Bai. Medikuntzaren kasuan konkurtsorik ez da eta bakarrik horregatik jada merezi du. Baina gisa guziz frantziar Estatuan ere ikasteko paperak egin behar dira. Hala ere, webguneak hobeto eginak dira. Lizeoak Hegoaldeko webguneak ulertzeko gida bat egin zigun, dena ongi egiteko.

Bilbon pisua topatzeko ongi moldatu zinen?

Gauzak azken mementoan egiten dira, notak oso berandu ditugulako. Frantzian Parcoursup plataforma duzunez, maiatzean jadanik badakizu nora joaten zaren eta pisua bilatzen ahal duzu denbora gehiagorekin. Ez nekien EHUn sartuko nintzela azken mementora arte. Bilaketa berant egin nuen eta zerbait atzeman nuen.

Osasun krisia dela eta, nola antolatuak dira zuen klaseak?

Frantziar Estatuan ikasten duten lagunekin konparatuz, klase presentzial gehiago ditugu. Haiek pisua alokatzen dute Internetez ikasteko. Gure kasuan, astelehen, astearte eta ostegunetan klase presentzialak ditugu, batez ere praktikak egiteko. Asteazken eta ostiraletan, online ditugu, teoria emateko.

Zer da zure ametsa?

Medikua izan nahi dut Iparraldean.

Zer esango zenioke Hego Euskal Herrian ikasteko zalantzak dituen norbaiti?

Pentsatzen dut merezi duela. Nire lagun batzuei esan diet prozedura abiatzea hemen ikasi ahal izateko. Lasaiago da, nahiz eta materia asko den. Hala ere, lan egiten baduzu eta 5/10en gain lortzen baduzu, ikasgaia gainditu duzu. Frantziar Estatuan 5/10en gain baldin baduzu eta zure ondokoak 9/10en baldin badu… lehia askoz gehiago dago azterketen notekin. Gainera, giroa ikasleen artean bikaina da, bereziki konkurtsorik ez delako. Baina orokorrean Ipar Euskal Herrian baino hobea da.