Igande gauean Bilboko txosna batean txiza egin zuten pertsonak iturginak izan zitezkeen, izan ere. Baina osasungarria da batzuek «horretan eragiteko interesak» izatea, are hobeto asko badira. Portaera hori era berean gaitzesgarria da iturgin batek eta mediku batek eginda... edo udaltzain batek. Azken kasuan, ordea, larrigarri nabarmena du, ahal den neurrian ekintza horiek galarazteko ardura duen norbait delako. Portaera horiek galarazteko ardura duelako, iturgin batek, mediku batek... nahiz polizia batek eginda ere; hala ere, sobera ezaguna da polizien artean korporatibismoa nagusi dela. Eta are deitoragarriagoa da polizia-kidegoen arduradun instituzionalek ez ikusi egin edo are justifikatzea.

Ez ziren oso egokiak izan asteartean Bilboko Udaltzaingoaren jarrera salatzen zuten konpartsakideen protestari bizkarra emanda agertu zen alkatearen hitzak. Haren bertsioak, neurri handian Bilboko konpartsen bertsioarekin bat datorrenak, ez zuen azalpen askorik eskaini, baina konpartsek xehe eta modu koherentean azaldu zuten gertatutakoa, txiza egiten ari zirenei kargu hartu zieten konpartsakideen jokaera eta udaltzainen mehatxuak barne. Mehatxu horiek konpartsakideek egin balituzte, udaltzainen jarrera erasokorra agertu izan balute, gertatutakoaren inguruan hitz egiteko «interesak» aipatuko lituzke Juan Mari Aburtok? Oso esanguratsua da zoriontzeko moduko balantze positiboa iruditzea Bilbon izan den atxiloketa «kopuru oso garrantzitsua». Segurtasuna ez da herritarrentzako zerbitzuari mesede egiten ez dioten agenteei nahi dutena egiten uztea, lanean nahiz zerbitzutik kanpo. Segurtasunaren lehentasuna ez da saltzaile ibiltariak jazartzea edo euskararen aldeko pankartak kentzea. Izan ere, horrek herritar askoren segurtasun falta handiagoa dakar.

Polizia-ereduari buruzko eztabaida ez da atzo goizekoa, luzatuz doa denboran zehar eta, aldi berean, eztabaida horri ez heltzearen ondorioak areagotu egiten dira, arazoa bideratzeko edo errotik aldatzeko ahalmena dutenek ez dutelako hartarako borondaterik. Bilboko hau ez da gertakari bakana, baizik eta polizia-kidegoek eta erakundeetako arduradunek jarduteko modua. Eta arduradun horiek gertakari horiei garrantzia kenduz eta are justifikatuz sustatu ere egiten dituzte.