Igeldo Toki Entitate Txikia izateko kontsulta ez-loteslea apirilaren 14an egingo da, igandearekin. Bozketa goizeko 9.00etatik 20.00etara izango da, Itsas Aurre eraikinean, Igeldoko plazan. Toki Erakunde Txikiak hartuko duen mugaketaren barruan erroldatuta dauden 16 urtetik gorako pertsona guztiak daude deituta; hau da, Igeldok dituen 1.067 biztanleetatik 984. Erantzun beharko duten galdera hauxe da: «Ados al zaude Igeldoko Toki Entitate Txikia sortzearekin?».

Erantzun posibleak «bai» edo «ez» izango dira, eta ezarritako hautetsontzian gutun-azal itxi baten barruan sartuko den boto-paper batean adieraziko dira. Emandako botoan erantzunik ematen ez bada, boto zuritzat hartuko da. Bozketa amaitutakoan, mahaiak botoen zenbaketa publikoa egingo du eta emaitza zehaztuko du. Aldeko emaitza izanez gero, espedientea Gipuzkoako Foru Aldundira bidaliko da, Foru Dekretu bidez ebatz dezan. Emaitza Toki Entitate Txikia eratzearen aurkakoa bada, organo eskudunak jendaurrean eta arrazoituta adieraziko du kontsultaren emaitzak nola eragingo duen proiektuaren bilakaeran.

Galdeketa, aipatu bezala, ez da loteslea izango; Igeldoko biztanleen iritzia jasotzea du helburu.

Igandean botoa ematera joan ezin dutenek edo aldez aurretik egin nahi dutenek dagoeneko badute egiteko aukera, apirilaren 12ra arte, hau da, aste honetako ostiralera arte.

Horretarako, Donostiako Udaleko Herritarren Partaidetzarako Zerbitzuan hitzordua eskatu beharko dute (943481356, udala_partaidetza@donostia.eus). Hitzordua hartu ondoren, Easo kaleko 43. zenbakira joan beharko dute bozkatzera.

Eneko Goia alkateak atzo egin zuen agerraldian nabarmendu zuenez, «Igeldoko bizilagunek igande honetan adierazi ahal izango dute auzoan emango den urrats garrantzitsu horren inguruko adostasuna edo desadostasuna».

Joan den otsailaren 6an, Tokiko Gobernu Batzarrak oniritzia eman zion erakundea eratzeari eta apirilaren 14an, datorren igandean, kontsulta ez-loteslea egiteari buruzko irizpenari.