Tuberkulosia prebenitzeko protokoloa bost ikastetxetan, kasu bat antzeman ondoren

Dagoeneko kontrolatuta dagoen tuberkulosi kasu bat detektatu ondoren, Osasun Sailak aurrea hartzeko protokolo bat abiatu du Bizkaiko bost ikastetxetan. Datozen egunetan, ikasleen gurasoekin eta langileekin bilerak egitea aurreikusi dute. Lakuak lasaitasunerako deia egin du eta prebentzio protokoloak egitea ohikoa dela adierazi du.

Lakuako Osasun Sailak aurreikusitako jarduketa protokoloa aktibatu du Bilboko, Arrigorriagako eta Ugaoko bost ikastetxetan, dagoeneko tratamendua jasotzen ari den eskola komunitateko kide batengan tuberkulosi kasu bat antzeman ondoren. Ziurtatu dute pertsona horren kontaktu estuen «azterketak agerian utzi duela ez dagoela inolako kutsadurarik».

Osasun Sailak azaldu duenez, tuberkulosiaren gaixotasuna, normalean, ez da larria Euskal Herrian, eta tratamendu egokiarekin sendatzen da. Airearen bidez kutsa daiteke, eztul egitean edo hitz egitean. Oro har, gaixotasun hori kutsatzeko, biriketako gaitza duten pertsonekin elkarbizitza estua eta luzea izan behar da; beraz, kasu honetan, kutsatzeko arriskua txikia da.

Hala ere, ikasleen eta gainerako langileen esposizio denbora oso laburra izan den arren eta kaltetutako pertsonak FFP2 maskara erabiltzen zuen arren, kontaktuen azterketa eskola eremura prebentzioagatik zabalduko dela argitu du Osasun Sailak.

Tuberkulosia Zaintzeko Euskadiko Protokoloan ezarritako jarraibideak betez, ohiko moduan, esku hartze bat abian jarri da, eta esku hartze horrek ikasleak eta irakasleak barne hartuko ditu, kutsatutako pertsonarekin harremanetan egon diren pertsonen azterketa eta jarraipena egiteko. Esku hartze hori maiatzetik ekainera bitartean egingo da bost ikastetxeetan.

«Esku hartzean, tuberkulinaren proba eta/edo odol analisi bat egitea planifikatu da, kutsatutakoarekin harremanetan egon ziren pertsonak infektatu ote diren egiaztatzeko. Kasu horretan, proba gehigarriak egiteko eta/edo prebentzio tratamendua emateko beharra baloratuko litzateke», azaldu du Lakuak.

Familiei eta ikastetxeei jada horren berri eman zaie bidali dizkieten gutunen bidez. Inguru horietako Osakidetzako ESIetako pediatrek jaso dute horren gaineko informazioa.

Datozen egunetan ikasleen gurasoekin eta langileekin bilerak egitea aurreikusi dute, informazio hori zabaltzeko eta zehazteko, eta sor daitekeen edozein zalantza argitzeko. Halaber, arreta telefono bat jarri dute deitutako bileretara bertaratu ezin duten pertsonen eskura.

Lan bateratu batean, Osasun Saila eta Hezkuntza Saila une oro koordinatuta egon dira esku hartze hori garatu ahal izateko.

Osasun Sailak lasaitasunerako deia egin du: «izan ere, prebentzio protokoloak egitea ohikoa da, tuberkulosia ez da aparteko gaixotasuna, eta, beraz, esperientzia daukagu ezarritako prozeduretan».