Txina-Afrika Lankidetza Foroa bilduko da aste honetan Pekinen, Asiako erraldoiak Kontinente Beltzean dagoeneko duen presentzia are gehiago sendotzeko eta bi aldeen arteko merkataritza dibertsifikatzeko. Foroa atzo hasi zen ofizialki, enpresa-topaketekin eta bertaratutako 50 nazio afrikarrentzako ongietorri afari batekin. Gaur Xi Jinping Txinako presidenteak datozen hiru urteetan Txinaren eta Afrikaren arteko lankidetzarako bide-orria aurkeztuko du. Lau gako ditu foro honetatik zer espero jakiteko.

Txina Afrikaren bazkide komertzial handiena izan da azken hamabost urtean, 2023an 282.100 milioi dolarrekin. Hala ere, gehiago nahi du, Afrikak munduko kobaltoaren bi heren, kobrearen %10 eta litio erreserbak dituela kontuan hartuta. Gainera, 10.000 kilometro trenbide, 100.000 errepide inguru, 1.000 zubi eta 100 portu eraiki ditu Txinak Afrikan azken urteetan, baina «karbono gutxi isurtzen duen lankidetzarako ikuspegi-aldaketa» nahi du, berrikuntza digitala eta ingurumenaren babesa azpimarratuz.

Proiektu horietako askok kritikak eragin dituzte Txinak zorra estrategikoki proiektu horiek finantzatzeko erabiltzen omen duelako, «zorraren tranpa» deritzona.

Pekinek zorra arintzeko konpromisoa hartuko du.