Geldi euskara zapaltzea!

Aitz Amilibia, Arantxa Irigoien*

Bernat Etxepare lizeoko terminaleko lehen belaunaldiko ikaskideak

Maiatzaren 17an euskararen alde mobilizatzeko Bernat Etxepare lizeoko ikasleek egin zuten deialdiarekin bat eginez, egun hartan Ipar eta Hego Euskal Herriko bost euskaltzalek ekintza bat burutu zuten. Baionako Suprefeturako horman, frantses Estatuko agintariei zuzendutako mezua idatzi zuten: «Geldi euskara zapaltzea». Ekintza horretan esku hartzeagatik, irailaren 10ean Baionan Gorka epaituko dute.

Idazki hau izenpetzen dugunak Bernat Etxepare lizeoko ikasle izanki baxoa pasatu genuen lehen hamaika ikasleetarikoak gara. 1992a zen, eta baxoa euskaraz pasa ahal izatea lehen aldiz eskatu zen. Orduan bezala, gaur ere euskarari oso atxikiak gaude, eta orduz geroztik gaur arte euskararen alde hainbat arlotan lanean jardun dugu: irakaskuntzan, aisialdian, komunikabideetan, antzerkian... Euskararen aldeko beste ekintza batzuetan esku hartzeagatik, martxoan Gorka jada epaitu zuten. Epaiketan, euskaraz deklaratzea debekatu zioten. Horiek hola, epaiketa bidegabe horretan ez esku hartzea erabaki zuen eta epaitegitik atera zen. Hala ere, epaiketa segitu zuten eta gogorki kondenatu zuten: hilabete bat presondegi atzerapenarekin eta 500 euroko isuna.

Irailaren 10ean, 13.30ean, euskalgintzak Baionako auzitegi aitzinean elkarretaratzea eginen du, ikasleei baxoa euskaraz pasatzea debekatzen zaiela salatzeko, frantziar eta espainiar estatuetako agintariek euskara zapaltzea geldi dezaten eskatzeko, euskararentzat justizia gauza dadin eskatzeko eta Gorkari elkartasuna adierazteko.

Guk ere, elkarretaratze horretara euskaltzaleak gomitatzen ditugu.

*Sinatzaileak: Aitz Amilibia, Arantxa Irigoien, Egoitz Urrutikoetxea, Esther Perurena, Gorka Torre, Iratxe Gaztelurrutia, Maite Tellechea eta Ximun Fuchs.