Martxel Iztuetak Binakakoa jokatuko du

Lau eta Erdikoa oraindik amaitu gabe denean, pilotazaleak hasi dira dagoeneko Binakakorako haien kinielak egiten. Azken urteetan egin izan ohi duen bezala, Baikok lehen pistak eman ditu, kantxaratuko dituen lau atzelarien berri emanda. Eta laukote horretan Martxel Iztueta gazte tolosarra da berrikuntza nagusia, bere lehen Binakakoa jokatuko baitu titular gisa. Iazko laukotearekin alderatuta, Lasorekin aritu zen Aitor Aranguren da kanpoan geratuko litzatekeena, Albisuk, Imazek eta Mariezkurrenak osatuko baitute Bilboko enpresaren atzelarien zerrenda.

20 urteko atzelariak iaz B-Serieko Binakakoa irabazi zuen Asier Agirrerekin bikotea osatuz, eta udan lehen mailako pilotarien artean lehiatzeko aukera izan du, Jokin Altunarekin Mastersean arituta. Maila bikaina eman zuen tolosarrak txapelketako finalera helduta, eta orain azterketa are zailago bati aurre egin beharko dio urteko txapelketarik luzeenean. Pentsatzekoa da, enpresak aurrelaririk onenetako batekin kantxaratuko duela, baina Baikok, momentuz, ez du aurrelarien inguruan ezer esan. Iaz Laso, Artola, Peña eta Jaka izan ziren titular aritu zirenak, eta ikusi beharko da azken hilabeteetan aurrerapauso nabarmena eman duen Larrazabal bezalako beste gazte baten aldeko apustua egingo duten.

PISTARIK EZ ASPEN

Aspek, bestalde, erabateko isiltasuna mantentzen du bere zortzikoaren inguruan. Eibarkoen kasuan, zalantzarik handienak laugarren atzelariaren inguruan leudeke, Zabaletak, Rezustak eta Martijak jokatuko dutela dudan inor gutxik jartzen baitu. Azken urteetan Xabi Tolosa izan da postu hori bete duena, baina anoetarra sanmateotatik partidarik jokatu gabe dago.

Tolosak jokatzerik ez badu, Aspek zailtasunak izan ditzake bere hutsunea betetzeko. Pilotazaleen ahotan aukera desberdinak entzuten dira. Esaterako, udan partida batean egin bezala, Ezkurdia atzelari jartzea edo Baikon lekurik izan ez duen Aitor Arangurenek Aspeko kamisetarekin jokatzea Binakakoa.