Euskal Herriko kontu batek ehun bat abusu salaketa jaso ditu dagoeneko, eta soinu teknikari bat nabarmendu dute

Bizitzako uneren batean bortxatuak, erasotuak, abusatuak... sentitu diren pertsonen testigantzak jasotzeko helburuz denuncias_euskalherria sortu dute. «Arrazoia edozein dela ere, orain arte argirik ikusi ez duten historia horiei ahotsa emango diegu. Partekatzen den guztiak anonimotasuna gordeko du. Beldurra taldez aldatuko da!», horixe da duela astebete Instagramen ireki zen Euskal Herriko kontu bat aurkezteko mezua, Euskal Herrian gero eta gehiago diren jardunbideei jarraiki, eta ehun bat testigantza bildu dituzte dagoeneko.

Salaketek, esate baterako, Sopelan, Gasteizen, Donostian, Irunen, Zarautzen eta Lekeition gertatutako kasuak biltzen dituzte. Erasotzaile tipologia askotarikoa da: bikotekide ohiak, biktimen lagunak ziren pertsonak, tatuatzaileak edo ginekologoak, argazkilariren bat, suhiltzaile bat, «eliteko kirolari ezaguna»...

Kasu batzuek presioak edo mehatxuak adierazten dituzte, beste batzuek sare sozialen bidezko kontrol edo jazarpen saiakerak adierazten dituzte, eta sexu erasoen salaketak ere agertzen dira, gisa honetakoak: «Duela lau urte inguru hasi nintzen itxuraz zoragarria zen mutil batekin irteten. Handik bi hilabetera, kondoirik gabeko sexu harremanak genituen bitartean (hori bai, onartu egin nuen), amaitzera zihoala ohartu nintzen, eta ez zenez aldendu, ez egiteko eskatu nion (bera gainean zegoen eta ezin zuen berarekin). Ez nionean egin, bultza egiten saiatu nintzen, eta ezetz erregutzen; berak gogor heldu zidan eta barruan eiakulatu zuen». Beste emakume batek dioenez, «nire aitaordeak nitaz abusatu zuen 9 urte nituela, eta 14 urte arte sistematikoki bortxatu ninduen».

I.C.G.-REN KASUA

Instagrameko kontu honetan pertsona jakin batzuei buruz egindako salaketak (horien izenak guztiz edo partzialki ezabatu dira argitalpenetan) beste biktima batzuek berretsi dituzte. Orain arte gehien agertzen den kasua, eta hainbat hedabidek jaso dutena, soinu teknikari eta musikari batena da, I.C.G. inizialak dituena. Berari buruz baieztatzen dena da «mila urtez nahi bezala ibili dela» edo «historikoki hainbat belaunaldi jazarri dituela».

I.C.G. aipatzen duten hainbat salaketa daudenez, Euskal Herriko biktimak harremanetan jarriko dituen Telegram talde bat sortzea erabaki dute.