Aldaketa klimatikoaren testuinguruan eta Agenda 2030 bete behar horretan, agintariek hainbat neurri ezarri izan dute eta ezarriko dute etorkizunean. Baina nik uste gehienok konturatu zaretela neurriak hartzen dituzten bakarrak gu garela, eta ez beraiek. Zenbat eta zenbat protokolo, goi bilera eta argazki faltsu, ondoren beraien erosotasuna alde batera uzteko gai ez direnean, herritar xumea estutuz. Birziklapena dela, garraio publikoaren erabileraren sustapena dela, gune berdeak direla... baina ondoren beraiek jet pribatuetan, auto pribatuetan eta kutsadura emendatzen.

Zalantzak ditut Agenda 2030 edo 2050 horrek ezertarako balio ote duen bere osotasunean, baina argi eta garbi daukat aldaketa klimatikoaren testuinguruan ez duela ezertarako balio. Herritar xumeak bere aletxoa jar dezake honetan guztian, baina neurri sendoak hartu behar dituztenak agintariak dira, bereziki industria mailan. Baina hemen industriak halako pisua du...

Begiak irekitzen ez ditugun bitartean eta benetako neurriak hartzera behartzen ez ditugun bitartean, adarra joko digute behin eta berriz, eta errua gurea balitz bezala tratatuko gaituzte. Zertarako balio izan du gure ahaleginak? Ezertarako ez. Klima berotzen doa. Benetan diot ergeltzat gaituztela, eta esnatu ezean ergelak izango gara.