Donostiako Aquariumean, Itsas Ingurumen Erasmus Mundus Masterraren 17. edizioa ospatzen ari dira egunotan, Itsas Ingurumen eta Baliabideen (Research in Mairne Enviroment and Resources-RiMER2023) graduondoko nazioarteko ikastaroaren lehen moduluari ekinez.

Hogeita bi herrialdetako 40 ikasle parte hartzen ari dira «ozeano-zerbitzuen jasagarritasuna, klima aldaketa eta itsasoen kutsadura» lantzen ari den ikastaro horretan.

Itsas ekosistemen kontserbazioa eta kudeaketa, klima aldaketaren inpaktua, arrantzu kudeaketa jasangarria eta ozeanoen kutsadura dira 18 zientzialari eta ikerle ospetsu aste honetan zehar jorratzen ari diren gai nagusietako batzuk.

Programaren barruan, bihar (hilak 3an) ‘Ingurudok’ mintegia burutuko da. Espazio horretan, EHUko 12 doktoregaik euren doktorego tesien proiektuak aurkeztuko dizkiete RiMER 2023ko ikasleei, «arlo horretan MER kontsortzioaren esparruan egindako azken ikerketen ikuspegia erakutsiz».

Itsas zientziak eta emakumeak

Ikastaroari lotuta, bestalde, emakumezko itsas zientzialariei dedikatutako jardunaldiak ospatuko dituzte maiatzaren 5ean, baita itsas zientzietako lanbide irteerei buruzko topaketak, ekainaren 7an; eta hilaren amaieran (20 eta 23 bitartean) eskolen astebeteko moduluak izango dira.

Jarduera horiek Plentziako Itsas Estazioan egingo dira. Azken aste horretan jorratuko den gai nagusia UNESCOren Ozeanoen Hamarkada izango da, «ozeanoen osasunaren mehatxuetan eta eurek giza-osasunean dituzten ondorioetan azpimarra jarriz, mundu osotik etorritako 30 irakasle gonbidatuen ekarpenari esker».