Katrina urakana zikloi tropikal handia izan zen. duela 18 urte, 2005eko abuztuaren 29an, Estatu Batuetako hegoaldea eta erdialdea astindu zuen, eta uholde larriak eragin zituen Floridan, Bahametan, Luisianan eta Misisipin.

Katrina izan zen Atlantikoan orain arte erregistratutako urakanik suntsitzaileena. 2.000 pertsona hil ziren gutxienez eta, beraz, Estatu Batuetako urakanik hilgarriena izan zen.

Estatu Batuetako Urakanen Zentro Nazionalak (NHCK, ingelesez) Bahamen inguruan enbata indartsu bat eratzen ari zela jakinarazi zuenean hasi zen guztia, 2005eko abuztuaren 23an. Ekaitz tropikal bihurtu zen berehala, eta Floridako hegoalderantz joan zen abuztuaren 25ean, lehenengo mailako ekaitz urakanatu bihurtuta. Ekaitz hori ahuldu egin zen lurra jotzean, baina handik ordu batzuetara indarberritu zen, Mexikoko Golkoan sartu zenean.

Abuztuaren 27an, urakanen eskalako hirugarren maila erdietsi zuen ekaitzak. Katrina berriro indartu zen, bere tamaina bikoiztuz, abuztuaren 28ko goizean, 280 km/o inguruko haizeek lagunduta. Ekaitzaren intentsitatea hain handia izan zen, ezen hirugarren kategoriako urakana izatetik bosgarren kategoriako urakana izatera igaro baitzen egun bakar batean.

Abuztuaren 28an bertan, New Orleanseko (Luisiana estatua) alkateak hiria nahitaez husteko agindu zuen, hiriaren zati handi bat itsas mailaren azpitik baitago. Gainera, ekaitz-alertak eta tornadoak izan ziren Luisiana, Misisipi, Alabama eta Georgian. George W. Bush presidenteak osasun publikoko larrialdi bat deklaratu zuen Golkoko kostalde osoan.

Abuztuaren 29an ur azpian esnatu zen hiria eta, denbora batez, New Orleans hutsik egon zen.