Urriaren 29an Donostiako kaleak hartuko dituen ‘marea arrosa’ solidariora deitu ditu Katxalin Bularreko eta Ginekologiako Minbiziak Jotako Gipuzkoako Emakumeen Elkarteak. «Urratsak ematen jarraitzeko» gonbidapena luzatu die gipuzkoarrei. Elkarteak 6.000 lagun bildu nahi ditu hitzordu horretan, bularreko minbiziaren ikerketari bultzada ekonomikoa emateko.

Maite Valle elkarteko ordezkariak urteroko sentsibilizazio kanpaina aurkeztu du erakundeetako ordezkariekin batera. Abian dagoen kanpainak hainbat ekitaldi eraman ditu kaleetara egun hauetan. Izan ere, zatirik handiena urriaren 29ra artekoa izango da, eta lurraldean zehar banatutako informazio-mahaiak eta saltokien erakusleihoak izango dira elementu nagusietako batzuk.

Donostiako kaleetan zehar igaroko den ‘marea arrosak’ kanpainaren ekitaldi zentral bat izaten jarraitzen du, bularreko minbizia ikustarazteko eta kirola babes eta prebentzio faktoreetako bat dela aldarrikatzeko.

Alderdi Ederretik 11.00etan

Alderdi Ederretik abiatuko da 11.00etan, eta 4,5 kilometro egingo ditu Gipuzkoako hiriburuko kaleetan zehar.

Izen-ematea www.katxalin.org webgunean egin daiteke, eta kamisetak erosteko aukera dago Garbera eta Urbileko Eroski dendetan, Apalategi eta Apalategi Woman Kiroletan.

Kanpainarekin bat egiteko sortutako ekimenaren inguruan, Aramendia gozotegiak egindako «arrosa koloreko Donut Solidarioa» aipatu dute, beste hainbat keinurekin batera gaixotasuna ikustarazteak duen garrantzia nabarmenduz.

Testuinguru horretan, Donostiako Bera Berako errugbi sailak, adibidez, Bularreko Minbiziaren Aurkako nazioarteko Egunarekin bat egin eta arrosa koloreko zapatila kordoiak salduko dituzte. Era berean, detekzio goiztiarreko programetan parte hartzearen garrantzian jarri nahi du fokua ekimenak.