Harold Pinter antzerkigile britainiarra 2008ko Gabon egunean hil zen, 78 urte zituela, gibeleko minbiziak jota. 2005eko Literaturako Nobel sariduna, Pinter bere belaunaldiko antzerkigile britainiarrik eraginkorrena eta aktibismo politikoaren ahots bizia izan zen.

Gidoilaria, aktorea, zuzendaria, ‘Companion of Honour’ ohorezko titulu britainiarra izendatu zuten 2002an, ‘Sir’ titulua baztertu ondoren. 30 lan baino gehiagoren egilea, Pinter 1930ean jaio zen Hackneyn, Londresko ekialdean dagoen auzoan.

Pinter aktore moduan hasi zen antzerkian. Lehen kontaktu horren ostean, lanak sortzeari ekin zion eta zuzendari gisa jarduteari. Hasierako etapan, pertsonen arteko inkomunikazio-arazoak lantzen zituen, batez ere. Antzerki eskola batean ikasi ondoren, 1957an ‘The Room’ estreinatu zuen, eta handik gutxira ‘The Dumb Waiter’.

Urtebete geroago, ‘The Birthday Party’ estreinatu zen, nahiz eta 1963an ‘The Caretaker’ filmarekin arrakasta lortu zuen. Zinemarako egokitzapen ugari ere egin zituen, hala nola ‘The French Lieutenant's Woman’ eta ‘Reunion’.

2005eko urrian, Suediako akademiak iragarri zuen Pinter Literaturako Nobel Saria irabazlea zela, eta honako hau adierazi zuen: «bere lanetan amildegia aurkitzen da eguneroko garrantzirik ezaren azpian eta gela itxietan lehian sartzen diren indarretan».

Britainia Handian idazle aski ezaguna izan zen, literatura lanengatik eta publikoki erakutsi zituen jarrerengatik. Bere bizitzaren azken urteetan, herrialde horren eta Amerikako Estatu Batuen kanpo politikaren aurkako azaldu zen ozen, hain zuzen Irakeko gerrari zegokionez. Gainera, gogor kritikatu zuen NATOk Serbian egindako bonbardaketa, eta kurduen eskubideak defendatu zituen.