AUG. 24 2023 Hiru lurrun tren asteburuan, eta irailean diesel historikoen denboraldiaren amaiera Lurrun trenen hiru zirkulazio irtengo dira asteburu honetan Azpietitik Lasaora. Bidaia horiek azarora arte mantenduko direla iragarri dute, diesel tren historikoen azken irteera, berriz, irailaren 1ean izango da. Trenbidearen Euskal Museoan ‘Zugastieta’ tren historikoa, artxiboko irudian. (Andoni CANELLADA | FOKU) GAUR8 Euskotreneko Trenbidearen Euskal Museoak hiru lurrun tren jarriko ditu martxan asteburuan (abuztuaren 26 eta 27an). Irailaren etorrerarekin, diesel tren historikoen denboraldia amaituko da, eta azken irteerak datorren ostiralean (irailak 1) egingo dituzte. Hala ere, lurrun treneko bidaiak larunbat eta igande guztietan mantenduko dira azaroaren 1era arte. Euskotrenek jakinarazi duenez, lurrun trenak honako ordutegia izango du Museotik (Azpeitia) Lasaora joateko: larunbatean, abuztuaren 26an, 12.00etan eta 17.30ean; igandean, abuztuaren 27an, 12.00etan. Asteartetik ostiralera diesel trakzioetako bidaiak eskainiko dira. Azpeitiako Trenbidearen Euskal Museotik Lasaorako irteerak 12.00etan eta 17.30ean izango dira. Museoaren ordutegia honako hau izango da abuztuaren 31ra arte: asteartetik larunbatera, 10.30etik 14.00etara eta 16.00etatik 19.30era; igande eta jaiegunetan, 10.30etik 14.00etara. Irailaren 1etik aurrera, udazkeneko ordutegia izango du: asteartetik ostiralera, 10.00etatik 13.30era eta 15.00etatik 18.30era; larunbatetan, 10.30etik 14.00etara eta 16.00etatik 19.30era; igande eta jaiegunetan (astelehenetan izan ezik), 10.30etik 14.00etara. Galdu ezin den tren eta erreminten bilduma Tren historikoetan bidaiatzearen xarmaz gain, iraganera bidaiatzeko aukera zabala eskaintzen du museoak. Izan ere, Burdinbidearen Euskal Museoak Europako tren bildumarik «onenetakoa» erakusten du bere instalazioetan, mota guztietako ibilgailuekin, hala nola lurrunezko lokomotorrak, dieselak eta elektrikoak, automotoreak eta bagoi mota desberdinak. Era berean, EAEko makina erreminten multzorik «osatuenetako» bat eskaintzen du, Urolako Trenbidearen tailer mekaniko zaharraren bitartez, eta XIX. mendearen amaieratik trenbidean erabilitako uniformeen eta munduko trenbide erlojuen bildumarik onenetako baten laginak ditu.